Inflacioni regjistron rënie në eurozonë – Të dhënat e muajit dhjetor nuk i japin “paqe” BQE

Inflacioni në eurozonë është ulur më shumë se sa ishte parashikuar një muaj më parë, por presionet mbi cmimet janë rritur duke lënë të kuptohet se Banka Qendrore Europiane do të vazhdojë të rrisë normat e interesit në muajt e ardhshëm.

Inflacioni në eurozonë, ku përfshihen 20 vende që kur Kroacia u bë pjesë e saj në 1 janar e këtij viti, është ulur në 9.2% në muajin dhjetor nga 10.1% në krahasim me një muaj më parë. Nivel më i ulët se parashikimi prej 9.7% i një sondazhi Reuters, në bazë të të dhënave të publikuara nga Eurostat.

Por ky lajm në dukje pozitiv, fsheh një prirje të pafavorshme, pasi pjesa më e madhe e rënies ndodhi për shkak të çmimeve më të ulëta të energjisë, ndërkohë që të gjithë komponentët kryesorë të inflacionit bazë u përshpejtuan.

Inflacioni bazë, i cili përjashton çmimet e paqëndrueshme të ushqimeve dhe energjisë, u rrit në 6.9% nga 6.6%, ndërsa një matës edhe më i ngushtë, duke përjashtuar çmimet e alkoolit dhe duhanit, tregoi një rritje të inflacionit në 5.2% nga 5%.

Inflacioni në shërbime dhe në mallrat industriale joenergjetike, të dy të vëzhguara nga afër nga BQE për të vlerësuar kohëzgjatjen e rritjes së çmimeve, është përshpejtuar.

Një shqetësim tjetër është se inflacioni i përgjithshëm mund të ketë rënë për shkak të një sërë masash të njëhershme ose të përkohshme, duke përfshirë subvencionet e qeverisë, dhe disa prej tyre mund të anulohen në janar kur inflacioni mund të përshpejtohet edhe një herë më shumë.

Problemi është se sa më gjatë që rritja e çmimeve do mbetet e lartë, aq më e vështirë do të jetë të zbutet pasi kompanitë fillojnë të rregullojnë politikat e tyre të çmimeve dhe pagave, duke përjetësuar inflacionin.

Kjo është arsyeja pse BQE rriti normat me një total prej 2.5 pikë përqindjeje vitin e kaluar dhe premtoi rritje të mëdha në shkurt dhe mars, në atë që është tashmë cikli më agresiv i shtrëngimit të politikave monetare në historinë e bankës.

Inflacioni nuk do të kthehet në 2% deri në gjysmën e dytë të 2025-ës, sipas parashikimeve të vetë BQE-së. Si tregjet ashtu edhe sondazhet kanë filluar të faktorizojnë mundësinë që inflacioni të qëndrojë mbi 2%, pjesërisht sepse një sërë faktorësh të jashtëm po përkeqësojnë problemet e BQE.

Një recesion dimëror duhej të rriste papunësinë, duke ndikuar thellë në presionet e çmimeve. Por recesioni po rezulton të jetë më i cekët se sa pritej dhe punësimi, tashmë në nivele rekord, në fakt po rritet. Mbështetja fiskale për familjet po rezulton gjithashtu të jetë më bujare nga sa pritej dhe këto shpenzime të tepërta do të rrisin fuqinë blerëse, duke kundërshtuar politikat kufizuese të BQE.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.