Investitorët, apel bankave europiane – “Mos financoni më naftën dhe gazin”

Bankat europiane aktualisht po rrezikojnë rrugën drejt reduktimit të emetimeve të karbonit dhe rritjen e energjisë së rinovueshme nëse nuk ndalojnë financimin e drejtpërdrejtë të fushave të reja të naftës dhe gazit këtë vit. Deklarata u bë nga investitorët që menaxhojnë asetet me vlerë më shumë se 1.5 trilion dollarë. ShareAction tha se e kishte bërë kërkesën me letër dërguar drejtuesve të Barclays, BNP Paribas, Credit Agricole, Deutsche Bank dhe Societe Generale.

Grupi përgjegjës i investimeve tha se investitorët që kanë nënshkruar kërkesën përfshijnë Aegon Asset Management, La Francaise Asset Management dhe Skemën e Pensioneve të Qeverisjes Vendore Britanike.

ShareAction konfirmoi se pesë bankat që kishte kontaktuar dhe HSBC e Britanisë renditen si financuesit më të mëdhenj europianë të kompanive kryesore të naftës dhe gazit që zgjeruan prodhimin midis 2016 – ës dhe 2021 – shit. Megjithatë, HSBC tha në dhjetor se do të ndalonte financimin e drejtpërdrejtë të fushave të reja të naftës dhe gazit, duke iu bashkuar bankave të tjera që kufizojnë financimin e aseteve. Investitorët po i vënë në dijeni këto banka se do të përballen me presion gjithnjë në rritje nëse nuk veprojnë shpejt për të anuluar financimet e tyre.

BNP Paribas tha në një email se kishte prezantuar objektiva të reja muajin e kaluar për të përshpejtuar kalimin në një ekonomi me karbon të ulët, duke përfshirë përfundimin e financimit të kërkimit dhe prodhimit të naftës e gazit si dhe uljen e ekspozimit ndaj gazit.

Credit Agricole tha se kishte përfunduar tashmë financimin e projekteve të reja të nxjerrjes së naftës dhe se kishte një plan për të arritur neutralitetin e karbonit deri në vitin 2050.

Deutsche Bank pranoi se kishte reduktuar ndjeshëm angazhimin e saj në sektorët me intensitet karboni që nga viti 2016 dhe kishte rënë dakord për objektivat për reduktimin e emetimeve të financuara deri në vitin 2030 dhe 2050.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.