Italia firmos me Katarin dhe Algjerinë – Vendi synon të shkëputet nga gazi rus dhe të sigurojë rezerva për dimrin

Italia nënshkroi një marrëveshje me QatarEnergy për zgjerimin e projektit “North Field East”, që do të rriste eksportet e gazit të lëngshëm nga 77 milion në 110 milion ton në vit. Marrëveshja do të zgjasë 27 vjet. Ndërkohë vijon reduktimi i volumit të gazit që vjen nga Moska. Brenda kësaj jave Italia do të vendosë nëse do të kalohet në gjendjen e alarmit për sa i përket krizës kombëtare të gazit. Objektivi është që vjeshta të mos e gjejë vendin me pak rezerva.

Të enjten e kaluar kolosi energjitik rus deklaroi se do i dërgonte Italisë 65% të volumit të kërkuar. Kompania italiane energjitike, Eni, konfirmoi se të premten volumi u ul në 50% dhe kjo situatë do të vazhdojë në rënie. Për t’i dhënë fund varësisë nga gazi rus, ENI nënshkroi një marrëveshje të re jo vetëm me Katarin por dhe me Algjerinë ndërsa e gjithë vëmendja është përqendruar tek magazinimin i gazit në pritje të dimrit.

Me një investim prej 28.75 miliard dollarësh projekti do të hyjë në fazë prodhimi brenda vitit 2025. Bëhet fjalë për një lëvizje strategjike sipas Romës, pasi prania italiane në Lindjen e Mesme do të përforcohet duke siguruar qasje për një prodhues global gazi të lëngshëm. Si dhe vendit me rezerva gazi natyror ndër më të mëdhatë në botë.

Përpjekjet e të gjithëve – siç dëshmon marrëveshja me Katarin – janë fokusuar në një qëllim: më shumë gaz nga vende të tjera përveç Rusisë, kryesisht duke e marrë nga Algjeria.

Qëllimi është gjithmonë të sigurohet volum i mjaftueshëm në pritje të vjeshtës dhe dimrit, të paktën deri në 70-80% brenda tetorit. Megjithëse Italisë i mungojnë aktualisht rreth 30 milionë metra kub gaz rus në ditë, është e mundur të arrihet një furnizim prej pak më pak se 200 milionë metra kub, duke tejkaluar kërkesën prej 150-160 milionë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.