Italia po plaket më shpejt se homologët e BE-së ndërsa popullsia e saj bie nën 59 milionë banorë!

Italia po plaket me një ritëm të konsiderueshëm më të shpejtë se homologët e saj të BE-së, me popullsinë e vendit që ka rënë në nën 59 milionë, tha agjencia kombëtare statistikore Istat.

Një rënie kaq e ndjeshme e popullsisë është një shqetësim i madh për një vend si Italia, i cili është goditur për dekada nga rritja e ngadaltë ekonomike. Kjo rezulton në më pak produktivitet dhe inovacion, si dhe në fatura më të larta të mirëqenies.

“Që nga 1 janari 2022 sipas të dhënave të para paraprake, popullsia (rezidente) ka rënë në 58.983 milionë,” tha presidenti i Istat-it, Giancarlo Blangiardo në një seancë parlamentare në Romë.

Blangiardo, një ekspert i shquar i demografisë, pohoi se popullsia kombëtare është zvogëluar në mënyrë të qëndrueshme vitet e fundit, me një humbje kumulative prej më shumë se 1.36 milionë banorësh që nga viti 2014.

“Pikëpamja demografike e vendit tonë karakterizohet nga një rritje e ndjeshme e jetëgjatësisë dhe nga një rënie po aq e theksuar e nivelit të lindjeve, duke rezultuar në një plakje shumë më të shpejtë të popullsisë në krahasim me pjesën tjetër të Europës”, tha ai.

Në shtator, Istat parashikoi që popullsia e vendit mund të tkurret me një të pestën, dhe ndoshta të bjerë në 54.2 milionë në 2050 dhe 47.7 milionë në 2070.

Giorgia Meloni dhe qeveria e saj e re e krahut të djathtë e kanë marrë këtë çështje në zemër, duke e bërë atë prioritetin kryesor të programit të tyre. Planet buxhetore të zbuluara së fundmi për vitin 2023 propozonin uljen e taksave të shitjes për produktet e kujdesit për fëmijë dhe rritjen e përfitimeve të fëmijëve, ndërsa ministri i familjes ka shpallur një “plan strategjik të lindjes”.

“Italia është e destinuar të zhduket,” tha Meloni në një intervistë në fillim të këtij viti, duke treguar tendencat e raportuara nga Istat. “Ne kemi nevojë për një plan madhor, qoftë edhe nga një këndvështrim kulturor, për të rizbuluar bukurinë e prindërimit.”

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.