Italia, taksa shtesë ndaj kompanive energjetike – Nga viti I ardhshëm, 50% tatim mbi fitimet e tepërta

Qeveria e Italisë ka hartuar një plan për të vendosur një taksë 50% mbi fitimet e tepërta të kompanive energjetike në vitin 2023, sipas projektbuxhetit për vitin e ardhshëm. Në këtë mënyrë, Roma dëshiron të zbusë përfitimin ekonomik që kanë marrë kompanitë e energjisë nga rritja e gjerë e çmimeve të naftës dhe gazit natyror.

Taksa do të llogaritet në 50% të të ardhurave të kompanisë për vitin 2022, që është të paktën 10% më e lartë se të ardhurat mesatare për periudhën 2018-2021. Nga ana tjetër, do të ketë një tavan që do të jetë i barabartë me 25% të vlerës neto të aktiveve në fund të vitit 2021.

Plani në fjalë është i ndryshëm nga ai i paraqitur javën e kaluar nga ministria e Financave e Italisë. Ky version parashikonte një taksim prej 35% nga janari deri në korrik 2023, por kjo taksë do të kishte të bënte me fitimet neto të kompanive dhe jo me të ardhurat totale.

Nga llogaritjet e përafërta, qeveria italiane pritet të mbledhë rreth 2,565 miliardë euro nga taksa e re, e cila ndjek kuadrin e propozuar nga Komisioni Europian dhe zëvendëson një taksë të ngjashme në fuqi këtë vit. Kjo takes ka shkaktuar një valë kritikash, ndërkohë që shumë kompani refuzojnë ta paguajnë atë.

Sipas kushteve të reja të përcaktuara në projektbuxhet, rreth 7,000 prodhues dhe furnizues të energjisë elektrike, gazit natyror dhe karburanteve duhet të paguajnë shumën e papaguar deri në mesin e vitit 2023.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.