Izraeli dhe Libani arrijnë një marrëveshje historike – I hapin rrugën kërkimeve potencialisht të pasura të gazit

Izraeli dhe Libani kanë arritur një marrëveshje historike, thanë liderët e secilës palë duke zgjidhur një mosmarrëveshje të gjatë për kufirin detar që përfshin fushat kryesore të naftës dhe gazit në Mesdhe. Shtetet e Bashkuara janë përpjekur të ndërmjetësojnë një marrëveshje midis vendeve fqinje për zonën prej 860 kilometrash katrorë të detit, e cila ka qenë e diskutueshme prej vitesh.

Ajo përfshin fushën e naftës dhe gazit Karish dhe një rajon të njohur si perspektiva Qanaa, të cilat pritet të bien respektivisht në ujërat izraelite dhe libaneze sipas marrëveshjes. Izraeli ka thënë se do të fillojë menjëherë nxjerrjen e naftës dhe gazit nga Karish dhe eksportimin e saj në Europë.

“Versioni përfundimtar i ofertës është i kënaqshëm për Libanin dhe plotëson kërkesat e tij dhe ruan të drejtat e Libanit për këtë pasuri natyrore,” tha presidenti i Libanit Michel Aoun në një deklaratë disa orë pasi mori ofertën përfundimtare të Izraelit përmes ndërmjetësit amerikan Amos Hochstein.

Aoun tha se shpreson që marrëveshja, e cila ende nuk është nënshkruar, do të shpallet “sa më shpejt të jetë e mundur”.  Draft-marrëveshja plotëson të gjitha parimet e sigurisë dhe ekonomike të përcaktuara nga Izraeli, tha Lapid, Kryeministri izraelit i cili do të mbledhë kabinetin e sigurisë të mërkurën pasuar nga një mbledhje e posaçme e qeverisë.

Zyrtarët libanezë kanë thënë se marrëveshja nuk do të thotë se do të nënshkruhet ndonjë “traktat” me Izraelin dhe kjo marrëveshje nuk është një hap drejt normalizimit të marrëdhënieve midis dy vendeve, të cilat teknikisht janë në luftë.

Të martën, ministri libanez i Energjisë Walid Fayyad tha gjithashtu se kompania franceze e energjisë Total, e cila zotëron kontratën për të eksploruar ujërat libaneze, do të fillojë të punojë në perspektivën e Qanaa “menjëherë”.

Bisedimet morën vrull pasi kompania me bazë në Londër për kërkimin e naftës dhe gazit Energean mbërriti në qershor për të filluar zhvillimin e fushës Karish në emër të Izraelit. Edhe pse anija Energean ndodhet në jug të zonës së diskutueshme, një pjesë e fushës është në një zonë që Libani kishte pretenduar.

Marrëveshja historike nuk prek kufijtë tokësorë, por ka të ngjarë të lehtësojë sigurinë dhe tensionet ekonomike për të dy vendet. Kryeministri i përkohshëm i Libanit Najib Mikati tha të enjten se një marrëveshje “do të na shmangë nga një luftë përfundimtare në rajon”.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.