Jep dorëheqjen Kryeministrja e Mbretërisë së Bashkuar pas vetëm 44 ditë nga emërimi: Mandati më i shkurtër në historinë britanike!

Kryeministrja e Mbretërisë së Bashkuar Liz Truss dha dorëheqjen të enjten pas një buxheti të dështuar të uljes së taksave që tronditi tregjet financiare dhe që çoi në një revoltë brenda Partisë së saj Konservatore.

Truss tha në një deklaratë jashtë Downing Street: “Ne përcaktuam një vizion për një ekonomi me taksa të ulëta dhe me rritje të lartë që do të përfitonte nga liritë e Brexit”. “E pranoj, megjithatë, duke pasur parasysh situatën, nuk mund ta dorëzoj mandatin me të cilin jam zgjedhur nga Partia Konservatore. Prandaj i kam folur Madhërisë së Tij Mbretit për të njoftuar se po jap dorëheqjen si lider i Partisë Konservatore”.

Partia tani duhet të përfundojë zgjedhjet e lidershipit brenda javës së ardhshme, më shpejt se periudha e zakonshme dymujore. Graham Brady, politikani konservator që është përgjegjës për votat dhe riorganizimet e lidershipit, u tha gazetarëve se tani po shikonte se si votimi mund të përfshinte deputetët konservatorë dhe anëtarët më të gjerë të partisë.

Truss ishte në detyrë për vetëm 44 ditë, duke e bërë atë kryeministren me mandatin më të shkurtër në historinë britanike. Për dhjetë ditë, veprimet e qeverisë së kryeministrisë u ndërpre në pas vdekjes së Mbretëreshës Elizabeth II.

Dorëheqja e saj erdhi pas një takimi me Brady, i cili kryeson Komitetin e vitit 1922 – grupi i deputetëve konservatorë pa poste ministrore, të cilët mund të paraqesin letra mosbesimi ndaj kryeministrit. Pak para takimit, një zëdhënës i Downing Street u tha gazetarëve se Truss donte të qëndronte në detyrë.

Gjatë orës që zgjati takimi, numri i deputetëve që kërkuan publikisht dorëheqjen e Truss arriti në 17. Numri i atyre që i kanë shkruar letra Brady duke shprehur mosbesimin ndaj kryeministrit u raportua të jetë mbi 100 deri të enjten.

Paundi u rrit me 0.5% kundrejt dollarit një orë pas njoftimit, duke u tregtuar me 1.1273 dollarë, duke prekur shkurtimisht një nivel më të lartë sesioni. Mbetet në nivelin që ishte më 22 shtator, përpara buxhetit të tregut të Truss-it. Yield-et e letrave 30-vjeçare, 10-vjeçare dhe pesëvjeçare (obligacionet sovrane të Mbretërisë së Bashkuar) ranë me rreth 5 pikë bazë pas fjalimit të shkurtër të Truss.

Partitë e opozitës Laburiste, Partia Kombëtare Skoceze dhe Liberal Demokratët bënë thirrje për zgjedhje të menjëhershme të përgjithshme të enjten pasdite. Udhëheqësi i laburistëve Keir Starmer tha: “Partia Konservatore ka treguar se nuk ka më një mandat për të qeverisur”.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.