Jep dorëheqjen presidenti i Bankës Botërore – David Malpass largohet nga posti para përfundimit të mandatit

I akuzuar si një mohues i ndryshimeve klimatike, pasi refuzoi që të pranonte provat shkencore për sa i përket rolit të aktivitetit të njeriut në ngrohjen globale, presidenti i Bankës Botërore, David Malpass ka dhënë dorëheqjen. Ai do të largohet nga posti në 30 qershor më pak se një vit nga përfundimi i mandatit të tij.

Ish-zyrtar i lartë i thesarit amerikan të shtetit, Malpass u emërua në 2019-ën nga presidenti i atëherëshëm amerikan, Donald Trump, i cili ka kundërshtuar gjithnjë politikat e gjelbëra, duke tërhequr Shtetet e Bashkuara të Amerikës nga Marrëveshja e Parisit e 2015-ës. Një vendim që më pas u rrëzua nga kreu aktual i Shtëpisë së Bardhë, Joe Biden.

Në një deklaratë për media Malpass sqaroi se ka vendosur të përballet me sfida të tjera pas një reflektimi të gjatë. Me daljen e tij nga skena, Shtëpia e Bardhë do të ketë mundësinë të vendosë në krye të Bankës Botërore dikë që mund të çojë përpara reformën e institucionit. Shtetet e Bashkuara të Amerikës janë aksioneri kryesor dhe jo të vetmit që kërkojnë me ngulm një reformë, e mbështetur dhe nga Gjermania. I kthyer në një ritual tashmë, Uashingtoni zgjedh kreun e Bankës Botërore, ndërsa liderët europianë zgjedhin numrin një të Fondit Monetar Ndërkombëtar.

Në shtator të vitit të kaluar, në prag të një konference të Kombeve të Bashkuara, Malpass u vendos në qendër të kritikave të Shtëpisë së Bardhë pasi refuzoi të thoshte nëse ishte dakord me provat shkecore për ndryshimet klimatike. Më pas ai kërkoi falje dhe u përpoq të shprehej në mbështetje të tyre, duke pohuar se në atë moment nuk u ndje i përgatitur. Por ai theksoi se e pranonte peshën e impaktit njerëzor tek ndryshimet klimatike. Më pas ai propozoi zgjerimin e misionit të Bankës Botërore, për të përfshirë në mënyrë shumë të qartë ndryshimet klimatike.

Në vitin 2022, Banka Botërore financoi projekte në të gjithë botën për një shumë prej 104 miliardë dollarësh.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.