Jo vetëm mesazh politik/ Çfarë parashikon “Deklarata e Tiranës”! Nga programi 1 miliard euro për investime te plani “Repower” i BE

Samiti i Tiranës nuk ishte një samit vetëm për të dhënë një mesazh politik por edhe një samit me një paketë konkrete projektesh. Në fund të samitit, liderët e BE-së dhe të vendeve të Ballkanit Perëndimor kanë firmosur atë që u emërtua si “Deklarata e Tiranës”; një deklaratë me 33 pika, e ndarë në dy drejtime; politike dhe ekonomike.

Sa i përket angazhimit politik, deklarata parashikon angazhimin e Ballkanit për të mbështetur qartazi politikat e BE-së ndaj Rusisë, deri në aplikimin e sanksioneve kufizuese njësoj si BE-ja. Bashkimi Europian nxit kryerjen e reformave të nevojshme politike si lufta kundër krimit e korrupsionit, dialogun Prishtinë-Beograd etj.

Por angazhimet ekonomike mes palëve duken më konkrete.

Veç marrëveshjes për të nisur heqjen e shërbimit roaming për vendet e Ballkanit nga Bashkimi Europian, deklarata parashikon gjtihashtu angazhimin e BE-së për të mbështetur vendet e Ballkanit për të kapërcyer vështirësitë ekonomike të krijuara nga konflikti ushtarak Rusi-Ukrainë.

Në këtë kuadër, BE angazhohet për një paketë financiare 1 miliardë euro në grante të cilat mund të sjellin 2,5 miliardë euro në investime, do të ndihmojë Ballkanin Perëndimor të zbutë ndikimin e krizës energjetike, raporton SCAN TV.

Një angazhim tjetër dypalësh është edhe “Plani REPoëer” i BE-së që synon të ndihmojë për të ulur varësinë e BE-së dhe Ballkanit Perëndimor nga gazi rus. Nëpërmjet Komunitetit të Energjisë, BE-ja po hap tregun e saj të energjisë elektrike për Ballkanin Perëndimor, edhe në sektorin e energjive së rinovueshme, duke iu nënshtruar reformave rregullatore.

Plani Ekonomik dhe Investimit (PEI) parashikon një paketë ambicioze investimi, duke mobilizuar afërsisht 30 miliardë euro për rajonin, të përbëra nga 9 miliardë euro financim me grante nga IPA III dhe deri në 20 miliardë euro në investime, të mobilizuara nga Instrumenti i ri i Garancisë së Ballkanit Perëndimor.

Vendet angazhohen të bashkëpunojnë në plane të përbashkëta për të frenuar emigracionin masiv nga vendet e Ballkanit e në këtë kuadër, parashikohet edhe një program i posaçëm për rininë. Po ashtu, të rinjtë e Ballkanit do të kenë mundësinë që të  studiojnë në universitete europiane pa pasur nevojën që të udhëtojnë atje.

Marrëveshja me 33 pika e Tiranës përmban gjithashtu një serë mesazhesh të qarta që në thelb kanë të njëjtin konkluzion: Ballkani Perëndimor duhet të jetë i orientuar vetëm drejt Bashkimit Europian në një procës që në fund do të sjellë integrimin e plotë të tyre.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.