JPMorgan: Çmimet e naftës mund të rriten me 240% – Shkak, ulja e prodhimit nga ana e Rusisë si reagim ndaj sanksioneve perëndimore

Ulja e prodhimit nga ana e Rusisë si reagim ndaj sanksioneve perëndimore për shkak të pushtimit të Ukrainës, do të shkaktojë një rritje të cmimit të naftës me 240%. Paralajmërimi është bërë nga JPMorgan

Çmimet e naftës mund të rriten 240%, në 380 dollarë për fuçi nëse Rusia ul në mënyrë dramatike prodhimin si reagim ndaj planeve perëndimore për të kufizuar çmimet e energjisë në vend. Paralajmërimi është bërë nga JPMorgan.

Liderët e G7-ës njoftuan javën e kaluar se po punonin për planet për të kufizuar çmimin e naftës ruse në një përpjekje për të ruajtur presionin ndaj Moskës për pushtimin e saj në Ukrainë.

Por analistët e JPMorgan shprehen se Rusia – një nga eksportuesit kryesorë të energjisë në botë – është në një pozicion relativisht të fortë falë rritjes së fundit të çmimeve të naftës dhe gazit natyror. Moska mund të hakmerret kundër ‘kufirit’ të çmimit të G7 dhe të ulë prodhimin e saj të naftës me deri në 5 milionë fuçi në ditë pa shkaktuar dëme të tepërta në ekonominë e saj, tha JPMorgan.

Por një ulje e tillë do të ishte katastrofike për tregjet globale të naftës, duke pasur parasysh mospërputhjen e ofertës dhe kërkesës që e ka çuar tashmë çmimin e naftës së papërpunuar Brent me pothuajse 50% këtë vit, në rreth 112 dollarë për fuçi.

“Skenari më ekstrem i një uljeje të prodhimit me 5 milionë fuçi në ditë mund të çojë çmimet e naftës në 380 dollarë stratosferike për fuçi, thanë analistët e JPMorgan. Vlerësimi nënvizon rreziqet e ashpërsimit të sanksioneve ndaj Rusisë në një kohë kur çmimet e energjisë po rriten dhe po shkaktojnë probleme të mëdha për politikanët perëndimorë.

JPMorgan tha se perspektiva ishte e pasigurt, por një rezultat më i mundshëm ishte se Rusia mund të ulë prodhimin e saj me 3 milionë fuçi në ditë, gjë që mund të çojë çmimet e naftës në 190 dollarë për fuçi. Prodhimi qëndroi në pak më shumë se 10 milionë fuçi në ditë në muajin maj, sipas gazetës financiare të Moskës “Vedomosti”.

G7, që përfshin SHBA-në, Britaninë e Madhe dhe Gjermaninë, po analizon mënyra për të kufizuar çmimet ruse, duke përfshirë ndalimin e blerjes ose shitjes së naftës ruse mbi një çmim të caktuar. Raportet kanë sugjeruar se ata mund të përdorin fuqinë e Mbretërisë së Bashkuar dhe të Europës mbi sigurimin global të transportit për të ndihmuar në zbatimin e një kufiri të tillë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.