Kafeja juaj e mëngjesit mund të ndihmojë planetin – Përdorimi i mbetjeve në sektorin e ndërtimit redukton sasinë e çimentos!

Ky është premtimi i një universiteti australian që të kthejë mbetjet e kafesë së përdorur në një material që mund t’i shtohet betonit për ta bërë atë më të fortë dhe më të qëndrueshëm. Betoni, i bërë nga përzierja e rërës dhe zhavorrit me çimento dhe ujë, është një prodhues kryesor i gazeve serrë, përgjegjës për rreth 8% të emetimeve në botë.

Studiuesit në Institutin Mbretëror të Teknologjisë së Melburnit (RMIT) ngrohën mbetjet e kafesë në 350 gradë celsius në një dhomë pa oksigjen për të krijuar një substancë të quajtur bioçar. Ky bioçar mund të zëvendësojë deri në 15% të rërës së përdorur në beton dhe ta bëjë atë 30% më të fortë, dhe kjo forcë shtesë do të thotë se nevojitet deri në 10% më pak çimento, sipas studiuesve.

Rreth 50 miliardë ton rërë dhe zhavorr gërmohen çdo vit, kryesisht për përdorim në beton. Nxjerrja e tij shpesh është shkatërruese për mjedisin dhe Kombet e Bashkuara thonë se është gjithnjë e më i pamjaftueshëm. Çimentoja, e cila prodhohet duke ngrohur një përzierje guri gëlqeror dhe balte në rreth 1500  gradë celsius, është përgjegjëse për shumicën e emetimeve të betonit.

RMIT, që po punon me disa kompani ndërtimi dhe betoni, duke përfshirë firmën australiane BildGroup, është duke formuar një kompani për të prodhuar bioçar dhe është në bisedime me Starbucks për të marrë mbetjet e saj të kafesë. Miliarda tonë mbetje kafeje prodhohen globalisht dhe shumica dërgohen për t’u groposur, ku lëshojnë metan ndërsa shpërbëhen.

Australia prodhon rreth 75,000 tonë mbeturina në vit dhe bioçari i bërë prej tyre mund të zëvendësojë deri në 675,000 tonë rërë në beton, sepse është një material më i dendur. Mbetjet e ushqimit përbëjnë rreth 3% të emetimeve të Australisë, sipas qeverisë, dhe shumica mund të shndërrohen përfundimisht në bioçar.

“Ne parashikojmë që rreth 60-70% (të mbetjeve organike) të mund t’i devijojmë nga landfilli në aplikime betoni,” thane studiuesit. Materiale të ndryshme organike prodhojnë bioçar me cilësi të ndryshme dhe RMIT ishte i pari që përdori kafenë në këtë mënyrë.

Kristi Ceta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.