Kaos në aeroportet e Europës: Pushimet e korrikut në rrezik! – Greva, anulimet e minutës së fundit dhe defektet teknike vështirësojnë situatën
Muaji korrik parashikohet të jetë shumë kaotik për sa i përket aeroporteve në Europë. Mijëra persona mund të mos udhëtojnë dot për shkak të anulimeve të minutës së fundit të fluturimeve, grevave të personelit dhe defekteve teknike.
Greva, anulime të minutës së fundit, defekte teknike. Në të gjithë Europën muaji i korrikut do të jetë vërtet kaotik për sa i përket fluturimeve. Parashikohen radhë shumë të gjata dhe vonesa. Pushimet e mijëra personave mund të rrezikohen.
Situata kaotike janë shënuar tashmë dhe të tjera paralajmërohen në aeroportet e vendeve të ndryshme europiane: nga Parisi në Londër e deri në Romë. Fluturimet rrezikohen për shkak të pandemisë së Covid. Kjo sepse në periudhën më të ashpër të pandemisë kompanitë ajrore reduktuan stafet dhe tashmë që situata i është rikthyer normalitetit mungon personelit dhe në disa kompani paralajmërohen protesta dhe greva.
Dy javët e fundit janë anuluar rreth 41 mijë fluturime. Anulimet do të vazhdojnë dhe do të arrijnë në shifrën 114 mijë mes korrikut, gushtit dhe shtatorit. Kompanitë që preken më shumë nga kjo situatë krize janë sidomos Lufthansa dhe ato që kontrollohen nga Eurowings, Swiss airlines, Brussels airlines e Austrian airlines, Ryanair, Easyjet, British Airways.
Në 17 korrik është parashikuar grevë nga shumë sindikata. Në Fiumicino të Italisë terminalet janë të mbipopulluara dhe radhët për të bërë check – in dhe për t’u ngjitur në avion janë të pafundme. Në Gjermani pasagjerët janë të detyruar të presin në radhë me orë të tëra për shkak të mungesës së personelit sidomos në sektorin e kontrollit. Në Spanjë janë grevat e personelit të Ryanair dhe Easyjet që po shkaktojnë situata kaotike. Janë të shumta fluturimet e anuluara në Francë. Dhe në aeroportet e Londrës, Amsterdam por dhe në ato të Portugalisë e Belgjikës por regjistrohen anulime të fluturimeve dhe vonesa.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.