Kërkimi shkencor i “merr” arsimit 27.5 miliardë lekë – Publikohet strategjia për 7 vitet e ardhshëm. Cilat janë objektivat e ministrisë?

Ministria e Arsimit ka publikuar strategjinë kombëtare për kërkimin shkencor, teknologjinë dhe inovacionin për 7 vitet e ardhshëm. E përqendruar tek zhvillimi i kërkimit shkencor për arritjen e standarteve të Bashkimit Europian, zbatimi i strategjisë për periudhën 2023-2030 është në masën 27.5 miliardë lekë.

Përqendrimi i kërkimit shkencor në fusha të ndryshme si shkencat, inxhineria, teknolgjia, mjekësia, bujqësia etj do të jetë në vlerën e 19.9 miliardë lekë osë  72% e fondeve të parashikuara për zbatimine kësaj strategjie.

Si qëllim të dytë për ta arritur, Ministria e Arsimti ka vendosur krijimin e një mjedisi që lehtëson dhe inkurajon mekanizmat e ndërveprimit dhe transferimit të teknologjive për bashkëpunim midis komunitetit të kërkimit, ekonomisë,  inovacionit dhe institucioneve publike” do të zër 23% e fondeve të parashikuara ose 6.37 miliardë lekë.

Ndërkohë qëllimi i tretë konsiston në promovimin e kulturës së shkencës dhe inovacionit në edukim për të siguruar një qasje didaktike me theksin në praktikat kërkimore dhe projektet, do të ketë një kosto në masën  1.25 miliardë lekë ose 5% e fondeve të parashikuara për zbatimin e kësaj strategjie.

Kosto mesatare vjetore e aktiviteteve të kushtuara për periudhën 2023-2030,  në vitin 2023 parashikohet të arrijë në masën 0.084% ndaj produktit të brendshëm bruto, në vitin 2026 parashikohet të arrijë në masën 0.152% e PBB,  si dhe në vitin 2030 synon të arrijë në masën 0.162% e PBB,  e detajuar sipas qëllimeve të politikës së programit sa vijon.

Impakti ekonomik i strategjisë konsiston në përmirësimin e cilësisë së institucioneve të arsimit të lartë (IAL) dhe rritjen e të ardhurave të tyre. Projektet kërkimore midis IAL-ve, biznesit dhe institucioneve qendrore pritet të sjellin impakt pozitiv në rritjen e investimeve dhe projektet kërkimore midis institucioneve të arsimit të lartë, biznesit dhe qeverisë do të sjellin impakt pozitiv në konkurueshmërinë e bizneseve në tregun vendas dhe ndërkombëtar.

Marinela Lina/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.