KESH, 34 milionë euro të tjera për blerje energjie – Tenderi u zhvillua në ditën më të “shtrenjtë” të bursës. Procedura, për 1 muaj
34 mln euro i ka kushtuar Korporatës Elektorenergjetike Shqiptare blerja e fundit e energjisë, që do të shërbejë për plotësimin e nevojave konsumatore në periudhën 1-31 tetor.
Kjo është një nga 3 procedurat e vetme, që KESH ka realiuzuar për blerje energjie me bazë mujore, duke qenë se deri më tani blerjet janë kryer me baza ditore ose javore, duke u ndikuar drejtpërdrejt nga luhatjet e çmimeve të energjisë në bursë. Në total, KESH njofton se ka blerë 74 500 Mwh, duke siguruar të gjithë sasinë e kërkuar, teksa çmimi mesatar arrin në 455.24 euro/mwh.
Sikurse, edhe në disa procedura të mëparshme, ky çmim është më i lartë se në bursë, ndonëse këtë herë diferencat janë më të ngushta. Sipas të dhënave nga Bursa Hungareze, që shërben si referencë për Shqipërinë, tregi i datës 29 shtator, kur është bërë blerja u mbyll me një çmim mesatar prej 425.25/Mwh.
Gjithsesi, kjo ka qenë dita kur çmimet kanë qenë më i larti përgjatë 7 ditëve të fundit, ku çmimet e energjisë variuan nga 336 – 389 euro/Mwh. Vetëm për blerjet e kryera gjatë muajit shtator, KESH ka shpenzuar rreth 79 mln euro, duke e çuar faturën totale vjetore në rreth 329 mln euro.
Gjithsesi, blerjet e muajit shtator janë shoqëruar edhe një rënie të ndjeshmë të rezervës energjetike në Kaskadën e Drinit, ku sipas të dhënave të raportuara nga KESH nga muaji korrik e deri më tani ky tregues është përgjysmuar.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.