KESH, tjetër blerje energjie – Çmimi mesatar, më shtrenjtë se në bursë. Shpenzohen 7 milionë euro, për nevojat e 7 ditëve
7 mln euro i ka kushtuar Korporatës Elektroenergjetike Shqiptare blerja e fundit e energjisë, që do të shërbejë për plotësimin e nevojave konsumatore në periudhën 24-30 tetor. Në total, KESH njofton se ka blerë 33 800 Mwh, me një çmim mesatar prej 205.81 euro/mwh.
Gjatë muajit tetor, në tregjet ndërkombëtare çmimet e energjisë kanë qenë ndjeshëm më të ulët në raport me muajt e mëparshëm. Gjithsesi, blerja e fundit e KESH është kryer me çmime më të shtrenjtë se ai në Bursën e Hungarisë, që shërben si referencë për transaksionet në Shqipëri.
Në datën 21 tetor, kur është realizuar blerja e mësipërme, çmimi mesatar në bursë ka qenë 185.04 euro/mwh apo gati 21 euro/mwh më pak se çmimi i deklaruar nga KESH. Gjithsesi, kjo nuk është hera e parë që Korporata Eletkroenergjetike Shqiptare blen energjinë me çmime mnë të shtrenjta sesa ato të Bursës Hungareze, çka reflektohet në shpenzime më të larta për blerje energjie.
Së bashku me blerjen e fundit, gjatë muajit tetor janë shpenzuar 14 mln euro për blerje energjie. Ndërkohë që, në fund të muajit shtator kreu një blerje mujore energjie për plotësimin e nevojave konsumatore në muajin tetor, me një çmim mesatar prej 455.24 euro/mwh, duke shpenzuar 34 mln euro. Së bashku me shpenzimet e kryera gjatë tetorit, fatura për blerjene energjisë që nga fillimi i vitit shkon në 343 mln euro.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.