Kina zbulon mrekullinë në qendër të Tokës – Çdo 8 vjet e gjysëm bërthama e brendshme lëkundet rreth boshtit të rrotullimit

Shkencëtarët në Kinë kanë bërë së fundmi një zbulim për zemrën e planetit tonë – çdo tetë vjet e gjysmë, bërthama e brendshme e Tokës lëkundet rreth boshtit të saj të rrotullimit.

Ky ndryshim ka të ngjarë të shkaktohet nga një mospërputhje e lehtë midis bërthamës së brendshme dhe mantelit të Tokës, shtresës nën koren e Tokës, sipas një studimi të ri shkencor.

Duke filluar rreth 2.896 kilometra nën sipërfaqe, bërthama e Tokës është e ndarë në një kufi të jashtëm të lëngshëm rrotullues dhe një shtresë të brendshme kryesisht të ngurtë. Kjo zonë është pjesërisht përgjegjëse për shumë nga dinamikat gjeofizike të planetit tonë, nga gjatësia e çdo dite deri te fusha magnetike e Tokës, e cila ndihmon në mbrojtjen e njerëzimit nga rrezet e dëmshme të emetuara nga Dielli.

Për studimin e tyre të fundit, Hoao Ding dhe bashkëautorët e tij konfirmuan më tej këtë cikël duke matur ndërrime të vogla në gjatësinë e ditës në mbarë botën, të cilat kontrollojnë lëvizjen periodike të boshtit të rrotullimit të Tokës, dhe duke i krahasuar ato me variacionet në lëvizjen polare të identifikuara më parë.

Të dhënat e tyre sugjerojnë se kjo lëkundje ka të ngjarë të shkaktohet nga një anim prej 0.17 gradë midis bërthamës së brendshme të Tokës dhe mantelit, gjë që bie ndesh me teorinë tradicionale të rrotullimit të Tokës, e cila supozon se boshti i rrotullimit të bërthamës së brendshme të Tokës dhe boshtit të rrotullimit e mantelit përkojnë.

Ky anim, sipas hulumtimit, mund të nënkuptojë se hemisfera veriperëndimore e bërthamës së brendshme mund të jetë pak më e dendur se pjesa tjetër e kësaj shtrese dhe se ka një ndryshim në densitet midis bërthamës së brendshme dhe të jashtme të Tokës.

Në të ardhmen, ky zbulim mund t’i ndihmojë studiuesit të kuptojnë dinamikën midis bërthamës së brendshme të Tokës dhe proceseve që prekin njerëzimin, nga tërmetet tek ndryshimet në fushën magnetike.

Kjo pjerrësi e zbuluar rishtazi në bërthamën e brendshme mund të çojë përfundimisht në një ndryshim në formën dhe lëvizjen e bërthamës së lëngshme, duke çuar në një zhvendosje të mundshme në fushën magnetike të Tokës.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.