Konsumatorët, optimistë për të ardhmen e ekonomisë – Vrojtimi i Bankës Qendrore, parashikojnë blerje në shuma të mëdha në të ardhmen

Besimi i konsumatorit te ecuria e ekonomisë ka vijuar rritjen edhe në këtë fillimviti, duke ju afruar mesatares asfatgjatë. Vrojtimi periodik që kryen Banka e Shqipërisë për matjen treguesit të ndjesisë ekonomike ka konkluduar se besimi konsumator vijoi të përmirësohet për të katërtin muaj rresht, duke iu afruar më shumë mesatares historike. Niveli i tij u rrit me 0.9 pikë përqindje në janar, duke qëndruar vetëm rreth 4 pikë nën mesataren historike. Rritja u ndikua nga pritjet më optimiste për situatën ekonomike e financiare, si dhe për blerjet në shuma të mëdha në të ardhmen.

Paralelisht, në rritje ka ardhur për këtë fillimviti edhe Treguesi i ndjesisë ekonomike, duke shënuar nivelin 106.3. Përmirësimi u përcaktua nga rritja e besimit në sektorin e shërbimeve dhe rritja e besimit konsumator. Dhe ka qenë pikërisht sektori i shërbimeve ai që ka dhënë kontributin më të madh të treguesve në muajin janar.

Sipas vrojtimit të Bankës së Shqipërisë, treguesi i besimit në shërbime vijoi prirjen rritëse për të katërtin muaj rresht, duke u rritur me 4.3 pikë përqindje në muajin janar. Si rrjedhim, niveli i tij vijon të mbetet ndjeshëm mbi mesataren historike, rreth 13.2 pikë përqindje më lart. Rritja u ndikua nga vlerësimet pozitive për ecurinë aktuale të biznesit dhe për nivelin e kërkesës. Vlerësimet e bizneseve të shërbimeve për nivelin e punësimit nuk kanë ndryshime të ndjeshme nga muajt e kaluar. Pritjet e tyre për ecurinë e çmimeve në të ardhmen vlerësohen me rritje.

Ndërkaq, Treguesi i besimit në tregti ra me 1.1 pikë përqindje në  muajin janar, por mbeti 1.2 pikë përqindje më i lartë se niveli mesatar. Bizneset e tregtisë vlerësuan me rënie ecurinë aktuale të biznesit të tyre, si dhe pritjet e punësimit. Gjithashtu, pritjet për çmimet në të ardhmen u vlerësuan me rënie.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.