Kontroll në mbi 62 mijë biznese për nëndeklarim pagash – Në “listën  e zezë” përfshihen subjektet deri në 5 punonjës

Lufta ndaj informalitetit do të jetë në fokus të administratës tatimore edhe përgjatë vitit 2023. Evazioni sa i takon nëndeklarimit të pagave i vendos bizneset në situatë të pabarabartë konkurrencë me kompani të mëdha që punësojnë mijëra persona dhe janë të rregullta me deklarimet, sikurse është rasti i Grupit Balfin, institucioneve financiare apo kompanive të telekomunikacionit.

Nëndeklarimi apo punësimi i personave të pa deklaruar,  përpos deformimit të tregut, sjell edhe të ardhura të munguara në buxhetin e shtetit dhe në skemën e pensioneve si dhe disavantazhe të mëdha për punonjësit sa i takon sigurimit të viteve të punës për efekt pensioni por dhe aksesit në kreditim, etj.

Aktualisht, krahas grupit të tatimpaguesve që po trajtohen nga Njësia e Informalitetit, Administrata Tatimore ka miratuar Planin Sektorial –“Miratimi i masave në lidhje me informalitetin në tregun e punës”, ku janë përcaktuar listat e tatimpaguesve me vetëm 1 punonjës të deklaruar, që rezultojnë në 37.643 tatimpagues ose 57% e totalit të tyre dhe lista e tatimpaguesve me 2-5 punonjës të deklaruar dhe 100% e tyre me pagë minimale që rezulton me 24. 977 tatimpagues me 63.299 punonjës.

Objektivi është pas kontrolleve të arrihet një rezultat me një përmirësim 5-10% të numrit të punonjësve të deklaruar për tatimpaguesit me 1 punonjës dhe një ulje 10-20% të punonjësve me pagë minimale. Në dokument thuhet se fokusi do të jetë rritja e deklarimit të pagave në tregun e punës dhe vijimi i kontrolleve në subjekte të fushës së sigurimeve, medias dhe arsimit, të cilët kanë rezultuar me parregullsi gjatë auditimeve të para të kryera nga Njësia AntiInformalitet.

Referuar planit të ndjekur nga njësia kundër informalitetit e cila u ngrit më 5 janar 2022,  u konkludua se nga 19 subjekte në fushën e arsimit, tregtisë, ndërtimit, sigurimeve, mediave të planifikuara për të verifikuar gjendjen e deklarimit të pagave për punonjësit e tyre, rezulton të gjithë këta tatimpagues i detyrohen buxhetit të shtetit një shumë prej 49. 7 milionë lekësh apo 426 mijë eurosh për të gjitha llojet e taksave.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.