Kosova bën ‘hap historik’ drejt anëtarësimit në Këshillin e Evropës – Kandidatura është miratuar me shumicë prej dy të tretave

Kosova ndërmori një hap drejt anëtarësimit në Këshillin e Evropës, mes kundërshtimeve nga Serbia.

Sipas AFP, Komiteti i Ministrave të Këshillit të Evropës “transmetoi për opinion” kërkesën për anëtarësim të Kosovës në Asamblenë e saj Parlamentare, megjithëse nuk dihet se kur do të jepet ky vendim.

Këshilli i Evropës është një organizatë ndërkombëtare e themeluar pas Luftës së Dytë Botërore për të mbrojtur të drejtat e njeriut, demokracinë dhe sundimin e ligjit në Evropë.

Ajo themeloi Konventën Evropiane për të Drejtat e Njeriut (KEDNJ), e cila mbron të drejtat e çdo qytetari brenda 46 shteteve që nënshkruan.

Ministrja e Jashtme e Kosovës, Donika Gërvalla-Schwarz ka përshëndetur vendimin duke thënë në Facebook se kandidatura e tyre është miratuar me shumicë prej dy të tretave.

“Për shtetin tonë të ri, vendimi i sotëm shënon një hap historik, ndoshta më i rëndësishmi që nga pavarësia jonë”, tha ajo, por paralajmëroi se procesi i anëtarësimit mbetet “i gjatë dhe i vështirë”.

Kosova fitoi pavarësinë nga Serbia në vitin 2008, megjithëse Beogradi ende kundërshton çdo njohje ndërkombëtare të ish-krahinës së saj.

101 vende e njohin zyrtarisht shtetin e vogël ballkanik, të populluar kryesisht nga shqiptarë etnikë, si të pavarur, duke përfshirë Britaninë e Madhe, SHBA, Francën dhe Gjermaninë.

Në maj, Prishtina paraqiti një ofertë për t’u anëtarësuar në Këshillin e Evropës, menjëherë pasi Rusia u dëbua për pushtimin e Ukrainës.

Dalja e Moskës, një aleate prej kohësh e Serbisë u konsiderua gjerësisht si një thjeshtëzim për hyrjen e Prishtinës.

“Ne do të votojmë kundër të ashtuquajturës anëtarësimin e Kosovës në Këshillin e Evropës”, u tha gazetarëve presidenti serb Aleksandar Vuçiq.

“Kjo ditë do të mbetet si ditë turpi për Këshillin e Evropës”, shtoi ministri i Jashtëm i vendit, Ivica Daçiq.

N.Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.