Kosova mbyll gjashtë zyra bankare serbe në veri të vendit!

Policia e Kosovës mbylli gjashtë zyra të institucioneve financiare të drejtuara nga Serbia në katër komuna me shumicë serbe në veri të vendit një javë pasi Banka Qendrore e Kosovës njoftoi se një periudhë kalimtare tre-mujore për politikën e saj të transferimit të parave vetëm në euro kishte përfunduar.

“Me qëllim të rivendosjes së ligjshmërisë… dhe me autorizim të prokurorit, Policia e Kosovës në bashkëpunim me Administratën Tatimore ka [mbyllur] gjashtë njësi të të ashtuquajturës Post Saving Bank si institucion ilegal financiar i Serbisë në Republikën e Kosovës,”  ka konfirmuar Ministri i Brendshëm Xhelal Sveclanë Facebook.

“Sundimi i ligjit, duke u shërbyer të gjithë qytetarëve pa asnjë dallim, do të vazhdojë të jetë synimi ynë”, shtoi Svecla.

Operacioni erdhi disa ditë pasi një takim tjetër i ndërmjetësuar nga Bashkimi Europian në Bruksel midis Kosovës dhe Serbisë nuk dha rezultat.

“Palët nuk mund të bien dakord për disa çështje kyçe, përfshirë shtrirjen e përgjithshme të aktiviteteve të entitetit të ri, shtrirjen e përfituesve të këtij entiteti dhe ndihmën financiare nga Serbia për institucionet e mbështetura nga Serbia në Kosovë”, tha BE-ja pas takimit, duke iu referuar një Asociacioni të propozuar të Komunave Serbe në Kosovë.

Më 1 shkurt, autoritetet e Kosovës u dhanë serbëve të Kosovës një kohë të pacaktuar për të filluar përdorimin e euros vetëm në transaksionet ditore dhe të ndalojnë përdorimin e monedhës së Serbisë, dinarin.

Lëvizja acaroi komunitetin ndërkombëtar, i cili i kërkoi Kosovës të mos ndërmarrë veprime të njëanshme kundër strukturave “paralele” serbe dhe i kërkoi Kosovës dhe Serbisë që ta diskutojnë këtë çështje brenda dialogut të ndërmjetësuar nga BE.

Kushtetuta e Kosovës e përcakton vendin duke përdorur “një monedhë të vetme”. Kosova ka përdorur euron që nga viti 2002, por njerëzit në komunat me shumicë serbe, veçanërisht në veri, përdorin dinarët serb dhe eurot.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.