Kosto shtesë për TEC-et lundrues – KESH hap tenderin 280 milionë lekë, gjenerimi i energjisë nuk fillon dot këtë vit!

TEC-et lundures nuk do të mund të nisin funksionimin, të paktën edhe për 4 mujat e ardhshëm. Shkak është mungesa e infrastrukturës së nevojshme të aksesit dhe ankorimit për operimin e tyre, ndërkohë që Korporata Elektorenergjetike Shqiptare sapo ka hapur tenderin për hartimin e projektit, që do duhet të zbatohet për ndërtimin e kësaj infrastrukture.

Fondi limit i vënë në dispozicion është 280 mln lekë, ndërkohë që në bazë të projektit që do të paraqesë kompania fituese do të përcaktohen kostot që do nevojiten për ndërtimin e saj.

Procedura tenderuese do të qëndrojë e hapur deri në mesin e muajit shtator, ndërkohë që KESH kërkon që nga momenti i nënshkrimit të kontratës kompania fituese të dorëzojë projektin Brenda 2 javësh.

Ndërkaq, sipas afateve të përcaktuara në dokumentet e tenderit,  do të duhet që afati i zbatimit të punimeve të jetë 90 ditë, çka do të thotë edhe në rast se procedura mbyllet me sukses, duke përzgjedhur ofertën e nevojshme dhe pa patur ankesa nga operatorët ekonominë pranë Komisionit të Prokurimit Publik, gjenerimi i energjisë nuk nis dot këtë vit.

KESH nisi procedurat për marrjen me qira të aesit në janar të këtij viti, pas autorizimit të dhënë nga qeveria që synoi rritjen e kapaciteteve gjeneruese të energjisë ne vend, për shkak të krizës energjetike. Impianti termik do të përdorë karburant të lëngshëm, si gasoil ashtu edhe mazut/solar për të gjeneruar energjinë, ndërkohë që përfaqësues të qeverisë kanë argumentuar vazhdimisht se kostot do të jenë më të ulta se ato në bursa.

Megjithatë, deri më tani nuk është bërë publik sesa do të të arrijë kosto për 1 MWh. Aktualisht është deklaruar se qiraja ditore do të jetë 63,000 USD, ndërsa vlera ditore e Operimit dhe mirëmbajtjes së asetit do jetë 31,500 USD. Karburanti do të duhet të sigurohet nga KESH, por kostot nuk janë bërë publike.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.