Krizë për domate në Britani! – Qytetarët përballen me sasi të kufizuar perimesh në markete

Supermarketet në Mbretërinë e Bashkuar aktualisht po përballen me mungesën e  domateve. Furnizimi me disa fruta dhe perime, përfshirë domatet, në supermarketet në Mbretërinë e Bashkuar është ndërprerë si pasojë e motit të keq në Europë dhe Afrikë. Konsorciumi Britanik i Shitjes me Pakicë – BRC – konfirmoi se të korrat ishin prekur nga “kushtet e vështira të motit”.

Ditët e fundit në rrjetet sociale po qarkullojnë fotografi të shumta të rafteve bosh nëpër supermarkete. Burime brenda industrisë kanë pranuar se ka pasur sfida të përkohshme për furnizimin e rregullt. Mes pamjeve të publikuara e të shpërndara në mediat sociale, mungesa e domateve duket të jetë veçanërisht e rëndësishme.

Një pjesë e konsiderueshme e domateve që konsumohen gjatë muajve të dimrit janë rritur në Marok dhe në jug të Spanjës. Të dy rajonet kohët e fundit janë prekur së pari nga moti i ngrohtë – i cili ndikoi në rendimentet e të korrave – më pas nga një valë e të ftohti që nënkupton kohë më të gjatë rritjeje. Tragetet e anuluara nga Maroku për shkak të motit të keq kanë ndikuar gjithashtu në furnizime.

Sipas Konsorciumit Britanik të Shitjes me Pakicë, supermarketet ishin në gjendje të menaxhonin çështjet e zinxhirit të furnizimit dhe po punonin me fermerët për të siguruar që klientët të kenë akses në një gamë të gjerë prodhimesh të freskëta.

Një pjesë e frutave dhe perimeve që Britania e Madhe importon gjatë dimrit vjen nga Holanda, ku ato rriten në sera të mëdha. Ndërsa është e qartë se bizneset që i prodhojnë ato janë prekur nga çmimet e larta të energjisë, nuk është e qartë nëse kjo ka pasur ndikim në furnizimet në Mbretërinë e Bashkuar.

Në Britani konsumohen rreth 500 mijë ton domate të freskëta në vit: 160 gramë për person në javë. Nga e gjithë sasia e domateve që blihet dhe konsumohet në Britani, fermerët vendas prodhojnë 1/5 e saj – rreth 100 mijë ton.

Pjesa tjetër importohet kryesisht nga vende të tjera të botës  – rreth 400 mijë ton. Në total, britanikët shpenzojnë 921 milionë paund për domate çdo vit. Nga kjo, rreth 190 milionë paund për domatet e rritura në vend.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.