KSHH, kritika ligjit “Për të drejtën e informimit”: “Krijohen premisa për pamundësi të marrjes së informacionit, gjobat të mos ulen!”
Komiteti Shqiptar i Helsinkit kritikon disa prej ndryshimeve të propozuara në ligjin “Për të drejtën e informimit”, jo vetëm në drejtim të kufizimit të informacionit, por edhe të uljes së nivelit të gjobave të propozuara.
Përmes një njoftimit për shtyp KSHH ndalet te neni mbi këkresat abuzive, që i jep të drejtë institucioneve të mos japin asnjë informacion nëse e konsiderojnë një kërkesë të tillë. Sipas KSHH, në relacionin shoqërues të projektligjit nuk jepet asnjë argument ligjor lidhur me domosdoshmërinë e shtimit të kësaj dispozite.
Megjithatë, KSHH vlerëson se kjo dispozitë në rastin e Shqipërisë, krijon premisa për të pamundësuar të drejtën për informim në mënyrë arbitrare nga autoritetet publike dhe se një parashikim i tillë nuk duhet të ekzistojë në ligjin shqiptar, në kushtet e problematikave me të cilat ndeshet zbatimi i tij.
Sa i takon nivelit të gjobave, Komiteti Shqiptar i Helsinkit ka evidentuar se projektligjit i cili parashikon uljen e vlerave minimale monetare të masave administrative krijon premisa për hapësira jo-propocionale dhe subjektive vlerësimi në dhënien e tyre nga Komisioneri për të Drejtën e Informimit.
Po ashtu Komiteti Shqiptar i Helsinkit vë në dukje faktin që në relacionin shoqërues të këtij projektligji nuk parashikohen arsyet që e justifikojnë këtë propozim për reduktimin e vlerës së këtyre gjobave administrative.
“KSHH, duke patur në konsideratë edhe praktikën e tij në raport me kërkesat për informacion, vlerëson se kufizimi i përgjegjësisë disiplinore tek koordinatorët e të drejtës për informacion nuk i përgjigjet konceptit të përgjegjësisë efektive”, – thuhet ndër të tjera në njoftim. Paralelisht me këto argumente, kërkohen edhe disa përmirësime të tjera të ligjit, në funksion të rritjes të aksesit të publikut në informacion.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.