Ku është më i kushtueshëm ndërtimi i apartamenteve në Europë? – Zyrihu dhe Dublini kryesojnë listën. Talini mbetet më i liri

Qyteti zviceran i Zyrihut dhe kryeqyteti irlandez Dublini kryesuan listën në një raport të fundit mbi kostot e ndërtimit në Europë. Të dhënat e publikuara analizojnë çmimin e ndërtimit të së njëjtës njësi banimi në dhjetë qytete.

Standardi është një bllok prej 39 apartamentesh me shtatë ose më shumë kate, që përmbajnë kryesisht shtëpi me dy dhoma gjumi. Sipas raportit, kostoja e ndërtimit të kësaj lloj shtëpie në Zyrih është afërsisht 2866 euro për metër katror, shifra më e lartë e regjistruar. I ndjekur nga Dublini, Mançesteri, Stokholmi dhe Glasgou.

Ndër qytetet më të lira janë Birminghami, Amsterdami, Brukseli dhe Belfasti. Qyteti më i lirë i studiuar është Talini i Estonisë, ku ndërtimi i një apartamenti kushton 1367 euro për metër katror, shumë më poshtë se mesatarja e qyteteve të tjera, e barabartë me 2057 euro për metër katror. Studiuesit morën parasysh kosto “të vështira”, si materialet, por edhe disa kosto “të buta”, si tarifat profesionale dhe taksat.

Dublini, një nga pikat kyçe të raportit, për vite me radhë ka luftuar për të ndërtuar shtëpi të mjaftueshme për të strehuar popullsinë e tij. Çmimi i ndërtimit të një godine në kryeqytetin irlandez është 2363 euro për metër katror. Sipas të dhënave nga Zyra Qendrore e Statistikave Irlandeze, 13.866 të rritur dhe fëmijë ishin në strehim për të pastrehët në Irlandë që nga marsi, një rritje vjetore prej 16%.

Megjithatë, një analizë më e gjerë e të gjitha qyteteve të studiuara sugjeron se çmimi i burimeve ndryshon shumë më pak se kostoja e punës. Duke cituar të dhënat e Eurostat, publikimi i ri thekson se në Estoni kostoja mesatare për orë e punës së ndërtimit është 16.50 euro.

Autorët e raportit theksuan se nevojiten më shumë kërkime për të krahasuar faktorë të tjerë, si çmimet e tokës dhe kostot e detajuara rregullatore. Duhet theksuar gjithashtu se shifrat e përfshira në raport i referohen tremujorit të parë të vitit 2020: prandaj ato u regjistruan përpara se kostot e ndërtimit të rriteshin për shkak të pandemisë dhe goditjes energjetike europiane.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.