Ku shkojnë paratë e buxhetit të shtetit? – Mbrojtja sociale merr 30 %. Mjedisi jashtë prioriteteve, më i diskriminuari

Buxheti i shtetit ka shpenzuar përgjatë vitit që lamë pas,  651 miliardë lekë apo 5.67 miliardë euro Por si janë shpërndarë këto para dhe ku janë përqendruar më së shumti?  Referuar të dhënave zyrtare të Ministrisë së Financave, mbrojtja sociale merr pjesën më të madhe të tortës, ku për vitin 2022 janë disbursuar 198 miliardë lekë apo 30 për qind të buxhetit total.

Në këtë zë përfshihen shpenzimet për pensione, barrëlindje, pagesë paaftësie.  Më pas renditen çështjet ekonomike, të cilat kanë marrë një buxhet prej  106.1 miliardë lekë ku përfshihet edhe pagesë papunësisë apo ndihma ekonomike, e ndjekur nga shërbimet e përgjithshme publike me 93.5 miliardë lekë.

Tek shërbimet e përgjithshme publike përfshihen investimet për vepra publike, të cilat sjellin edhe impakt ekonomik në zonat ku përqendrohen.  Ndërkohë, 63.7 miliardë lekë shkojnë për sektorin e shëndetësisë ku përfshihen edhe pagat apo bonuset e mjekëve dhe afro 63 miliardë lekë për sektorin e arsimit, ku përfshihen pagat e mësuesve. 56.7 miliardë lekë janë akorduar për strehimin dhe komoditetin e komunitetit, ku përfshihet programi i kredive të buta, bonusit të qirasë, etj dhe 36.5 miliardë lekë janë shpenzuar për rendin dhe sigurinë në vend.

Në shpërndarjen e buxhetit sipas funksioneve më pak rëndësi ka marrë mbrojtja, për të cilën kanë shkuar 15.5 miliardë lekë, argëtimi, kultura dhe çështjet fetare me 10.6 miliardë lekë dhe në fund renditet mbrojtja e mjedisit, e cila duke se është larg prioriteteve të qeverisë dhe për këtë sektor janë shpenzuar vetëm 7 miliardë lekë.

Shpenzimet publike në tërësi nuk kanë ndjekur një trajektore normale shpërndarjeje përgjatë vitit, pasi sipas të dhënave,  nëse disbursimi përgjatë muajve ka variuar nga 32 deri në 55 miliardë lekë,  në Dhjetor janë shpenzuar 137 miliardë lekë, apo afro 21 për qind e buxhetit total.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.