Kufi i përkohshëm në çmimet e gazit natyror – Von der Leyen: Hapi i parë për reformë strukturore të tregut tonë të energjisë elektrike
Komisioni Europian po shkon drejt vendosjes së një kufiri të përkohshëm të çmimeve të gazit natyror dhe një furnizim të përbashkët të produkteve energjetike, deklaroi Presidentja e Komisionit, Ursula von der Leyen gjatë fjalimit të saj në Parlamentin Europian.
Ajo theksoi nevojën për të pasur kushte të barabarta në tregun e brendshëm të energjisë dhe për të siguruar një furnizim të përbashkët me energji për të gjithë Bashkimin Europian. Kjo është një lëvizje e ngjashme me atë të vitit 2020 për furnizimin e përbashkët të vaksinave kundër koronavirusit për të 27 vendet anëtare.
Von der Leyen theksoi se duhet të vendoset një tavan në çmimet e furnizimit të gazit natyror që përdoret për të prodhuar energji elektrike dhe kjo duhet të bëhet përkohësisht derisa të vendoset një standard i ri në mbarë Bashkimin. Ajo vuri në dukje synimin e Brukselit për konsultime më të avancuara me ofrues të besueshëm të energjisë, siç është ndër të tjera Norvegjia.
Autoritetet në Bruksel tashmë kanë filluar përgatitjet për vendosjen e përkohshme të tavanit të çmimit të gazit, me qëllim të funksionimit optimal të tregut.
“Ne duhet të kufizojmë ndikimin inflacioniste të rritjes së çmimit të gazit natyror në çmimet e energjisë elektrike. Kjo është arsyeja pse propozojmë vendosjen e një tavani për çmimin e gazit për prodhimin e energjisë, që do të jetë hapi i parë për një reformë strukturore të tregut tonë të energjisë elektrike”, shpjegoi Von der Leyen.
Ajo shtoi se është ulur konsumi i gazit në Bashkimin Europian me 10%, diçka e mirë, por jo e mjaftueshme. Magazinimi i gazit tani është afër 90%, që është 15 pikë përqindje më i lartë se vitin e kaluar.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.