Kurse për blegtor dhe përpunues qumështi – Cilat janë degët e veçanta profesionale që synojnë të frenojnë emigracionin?

Emigrimi masiv i fuqisë punëtore, për të rinjtë e kualifikuar por edhe për ata që nuk kanë një formim dhe kërkojnë mundësi të reja në tregjet europiane, është kthyer në një fenomen gjithnjë e më shqetësues për vendin tonë, duke krijuar problem edhe tek bizneset.

Për këtë arsye, Agjencia Kombëtare e Punësimit dhe Aftësive, përveç kurseve standarde që ofrojnë qendrat e formimit profesional, ka mundësuar edhe ofrimin e kurseve të veçanta, duke iu përgjigjur kërkesës së bizneseve por edhe për të frenuar disi emigrimin, duke krijuar më shumë shance punësimi për ata që aktualisht nuk kanë një profesion apo zanat. Kështu, nëse më parë blegtor mund të quhej dikush që jetonte në fshat dhe merrej me bagëtitë, tashmë ka një kurs të dedikuar për blegtor, kjo për shkak edhe të braktisjes së fshatrave.

Po ashtu, ka kurse për punëtor për mbledhje, kultivim dhe përpunim të bimëve mjekësore; punëtor për mbledhje, kultivim dhe përpunim të frutave të malit; përpunim i qumështit dhe nënprodukteve të tij; përpunim peshku, shërbime në bujtina apo kasap. Ndërkohë disa nga profesionet e harrura dhe të rikthyera përmes kurseve, janë qendistari, përpunim brumi bukëpjekës, hekurkthim, hekurpëpunim, llamanirist etj. Këto kurse ofrohen nga qendrat e formimit profesional në të gjithë vendin dhe për ata që janë punëkërkues të papunë, janë falas.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.