Ligj i ri për e-albania, gati portali e-rezidenca (virtuale) për të huajt – E detyrueshme ngritja e sistemeve Backup për sulmet, servera rezervë në vendndodhje të tjera
Legjislacioni për shërbimet elektronike po ndryshon tërësisht, duke nisur nga shtimi i tyre, te mënyra si do të orohen, dhe veçanërisht siguria e tyre. Është depozituar tashmë në Kuvend Projektligji për Qeverisjen Elektronike, i cili ka qëllim përcaktimin e përgjegjësive të shtetit e privatëve sa i përket krijimit e menaxhimit të tyre, por veçanërisht detyrimin e të gjitha palëve për respektimin e standardeve të sigurisë elektronike.
Ndërkohë që një prej risive kryesore do të jetë trajtimi i dokumentit që gjenerohet nga sistemi në përfundim të një procesi aplikimi apo marrjeje shërbimi elektronik, që projektligji e sjell në termin “dokument elektronik administrativ” dhe e përkufizon atë si dokument të gjeneruar nga sistemi elektronik në përfundim të përfitimit të shërbimit elektronik publik, me kërkesë të kërkuesit në portalet qeveritare. Një element tjetër i rëndësishëm lidhur me këtë është “Vlefshmëria ligjore e këtyre dokumenteve”.
Projektligji përcakton se dokumentet elektronike administrative, që përfitohen nga bazat e të dhënave shtetërore kanë të njëjtën vlerë ligjore dhe fuqi provuese si çdo dokument tjetër zyrtar. Ligji i ri përcakton gjithashtu qartë detyrimet që ka çdo autoritet publik për të parashikuar dhe realizuar investime për krijimin e sistemit të vazhdueshmërisë së punës (Business Continuity) dhe sistemit të ruajtjes së informacionit (Backup), të cilat bëjnë të mundur ruajtjen e të dhënave dhe vijimin e aktiviteteve edhe në raste sulmesh të rënda kibernetike.
Një moment tjetër kyç i ligjit të ri janë dhe përcaktimet e sistemit e- rezidenca për shtetasit e huaj, i cili u mundëson shtetasve të huaj të aplikojnë për rezidencë virtuale në Republikën e Shqipërisë, për të përfituar të drejtën e hapjes së një biznesi në Republikën e Shqipërisë, pa qenë nevoja e paraqitjes fizike, si dhe Posta Elektronike Shtetërore (PESH), e cila është mënyra e vetme e komunikimit elektronik zyrtar në marrëdhenien institucion-shtetas-institucion dhe institucionbiznes-institucion.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.