Ligj i ri për huatë shtetërore të viteve ’90 e Pandemisë – Kompetenca të reja Agjencisë së Trajtimit të Kredive, sipas ligjit të falimentit dhe barrave

Ndërsa procesi i mbledhjes së kredive shtetërore të viteve 90’ nuk ka funksionuar, Qeveria po shfuqizon ligjin aktual, duke miratuar një ligj të ri i cili do të bëjë të mundur mbledhjen e tyre, por edhe të atyre të reja të krijuara gjatë pandemisë. Projektligji tashmë është depozituar në Kuvend dhe parashikon shfuqzimin e Ligjit të vitit 2002 “Për Agjencinë e Trajtimit të Kredive” dhe zëvendësimin e tij me Ligjin “Për Menaxhimin e garancive dhe kredive shtetërore të pakthyera”.

Në relacionin shoqërues, theksohet se nevoja për ndryshimet ka lindur nga emetimi i dy skemave të garancive shtetërore në përfitim të biznesit, në situatën e Covid-19, në kushtet ku infrastruktura aktuale ligjore, por edhe strukturore, nuk i përgjigjet nevojave për raportim, kontrollim, verifikim, menaxhimin e të dhënave e të tjera aspekteve, që shkojnë deri në rikuperimin e detyrimeve të bizneseve kundrejt buxhetit të shtetit që gjenerojnë nga këto lloj skemash, janë hartuar draftet përkatëse të akteve ligjore, që do të mundësojnë ndryshimin e ligjit të borxhit dhe ligjit të Agjencisë së Trajtimit të Kredive (ATK).

Edhe ligji i ri ja ngarkon përsëri Agjencisë së Menaxhimit të Garancive dhe Kredive të Pakthyera detyrën për kthimin e tyre, por duke e ngarkuar këtë të fundit me kompetenca të reja.

Agjencia tashë do ketë si funksion menaxhimin e skemave të veçanta të garancive të huas; kthimin e garancive shtetërore të huas; kthimin e huave dhe nënhuave të garantuara nga Ministria e Financave; verifikimin e aftësisë paguese të subjekteve huamarrëse; trajtimin e kredive, të transferuara nga bankat tregtare të nivelit të dytë, me kapital tërësisht shtetëror pas privatizimit të tyre; dhe trajtimin e portofolit të investimeve të kryera në banesa nga shoqëria INSIG, sh.a., para privatizimit të saj. Agjencia tashmë do të funksionojë në bazë të legjislacionit për falimentimin dhe barrët siguruese.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.