Lira turke, sërish në rënie të lirë – “Shpresat” janë tek ministri i ri i financave, Simsek

Lira turke ka shënuar përsëri rënie prej pothuajse 1%, pak pas emërimit të të shumë  vlerësuarit Mehmet Simsek si ministri i ri i Financave në vend.  Lira arriti në 21.1 për dollar, jo shumë mbi nivelin më të ulët rekord prej 21.8 javën e kaluar.

Presidenti turk Tajip Erdogan bëri të qartë se qeveria e tij e sapozgjedhur do t’i rikthehej politikave ekonomike më ortodokse kur emëroi Mehmet Simsek në kabinetin e tij për të trajtuar krizën e kostos së jetesës në Turqi dhe probleme të tjera financiare me të cilat po përballet vendi.

Sipas analistëve, emërimi i Simsek si ministër i Thesarit dhe Financave mund të krijojë terrenin për rritje të normave të interesit në muajt e ardhshëm. Një kthesë e dukshme kjo nga politika e afatgjatë e Erdoganit për uljen e normave pavarësisht rritjes së inflacionit.

Simsek, 56 vjeç, fitoi besimin e tregjeve gjatë mandateve si ministër i financave dhe zëvendëskryeministër midis 2009 – ës dhe 2018 – ës. Ai tha se vendi nuk ka zgjidhje tjetër veçse të kthehet në “terren racional”.

Emërimi i tij shihet si një sinjal se qeveria e sapozgjedhur e presidentit Tajip Erdogan po largohet nga ulja joortodokse e normave të interesit përballë inflacionit të lartë që e çoi lirën në një rënie të gjatë në kohë.

Ekspertët shpresojnë se Simsek mund të nxisë ortodoksinë ekonomike shumë të nevojshme dhe të angazhohet me tregun në mënyrë më efektiv.

Inflacioni vjetor i çmimeve të konsumit në Turqi arriti një kulm 24-vjeçar përtej 85% vitin e kaluar dhe qëndroi në 44% në prill, si shenjë se kërkohej shtrëngim i mëtejshëm monetar. Ekspertët theksojnë se një kthim i thjeshtë në politikën ekonomike të besueshme mund të sjellë një ndryshim të dukshëm në tërheqjen e investimeve të Turqisë. Sipas tyre perspektiva afatgjatë për Turqinë është ende shumë pozitive: një popullsi e re, një klasë e mesme në rritje dhe një vend që ka një vendndodhje strategjike kyçe, pra një sërë faktorësh në favor të saj.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.