Lufta kundër inflacionit në SHBA – FED ka nevojë për pavarësi dhe shmangie të politikave sociale

Pavarësia e Rezervës Federale nga ndikimi politik është thelbësore për aftësinë e saj në luftën kundër inflacionit, deklaroi kreu i institucionit, Jerome Powell. Sipas tij, situata kërkon qëndrimin jashtë çështjeve si ndryshimi i klimës që janë përtej mandatit të saj të vendosur në kongresin amerikan.

Ai tha se rivendosja e stabilitetit të çmimeve kur inflacioni është i lartë mund të kërkojë masa që nuk janë të njohura në periudhën afatshkurtër, pasi rritja e normave bëhet për të ngadalësuar ekonominë. Sipas tij mungesa e kontrollit të drejtpërdrejtë politik mbi vendimet lejon marrjen e këtyre masave të nevojshme, pa marrë parasysh faktorë politikë afatshkurtër.

Powell theksoi se FED duhet t’i përmbahet objektivit të saj dhe të mos humbasë kohë në ndjekje të përfitimeve të perceptuara sociale që nuk janë të lidhura ngushtë me qëllimet dhe autoritetet statutore.

Megjithëse Powell tha se fuqitë rregullatore të Fed i japin asaj një rol “të ngushtë” për të siguruar që institucionet financiare “të menaxhojnë siç duhet” rreziqet me të cilat përballen nga ndryshimet klimatike, ai shtoi se Fed nuk është dhe nuk do të jetë një politikbërës klimatik.

Ai sqaroi se pa legjislacion të qartë të kongresit, do të ishte e papërshtatshme që të përdoret politika monetare e FED ose mjetet mbikëqyrëse për të promovuar një ekonomi më të gjelbër ose për të arritur qëllime të tjera të bazuara tek klima.

Komentet e Powell, veçanërisht për ndryshimin e klimës, nuk janë të reja.

Por deklarimi i rradhës u cilësua më i ashpër në kuadrin e vërejtjeve të tij të para publike që kur Partia Republikane e SHBA vendosi një nga anëtarët e saj si Kryetar të Dhomës së Përfaqësuesve dhe filloi zgjedhjen e kryetarëve të rinj për komitetet që mbikëqyrin operacionet e qeverisë federale, përfshirë Fed.

Powell, tani në vitin e tij të pestë si kryetar i Fed-it, i ka dhënë një prioritet të lartë ndërtimit të marrëdhënieve të forta me zyrtarët e zgjedhur nga të dyja partitë kryesore të SHBA-së, por u përball me kritika nga disa republikanë për lejimin që Fed të largohej nga përgjegjësitë e saj kryesore, në fusha si ndryshimi i klimës.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.