Lufta largon turistët nga Deti Adriatik: Nuk ka më pushues nga Ukraina dhe Rusia!

Asnjë shenjë të pranisë së turistëve rusë përgjatë bregut Adriatik në Malin e Zi, në një moment që lufta në Ukrainë dhe sanksionet ndaj Moskës mbajnë turistët larg nga vendet që dikur ishin destinacionet e preferuara për pushimet e verës.

Resortet në Kroaci, Mal të Zi dhe Shqipëri, vende anëtarë te NATO-s që i janë bashkuar sanksioneve kundër Rusisë, po ndjejnë mungesën e tyre në një goditje të rradhës për ekonomitë e vendeve.

Sanksionet përfshijnë dhe një ndalim të fluturimeve tregtare nga Rusia, përjashtimin e bankave nga sistemi ndërkombëtar i pagesave duke e bërë më të vështirë për rusët që të shpenzojnë para’ jashtë vendit. Gjithashtu, janë sekuestruar dhe prona e jahte të oligarkëve rusë.

Në resortin malazez të Beçiç, hotelierët shprehen se presin pak turistë nga të dyja vendet këtë vit, dhe pse ka shumë ukrainas dhe rusë që i janë larguar luftës e që kanë marrë prona me qira për një kohë të gjatë në vend.

Por ata nuk mjaftojnë për të arritur shifrën e 380 mijë rusëve që vizituan Malin e Zi në 2019-ën, për të shtuar se shpenzojnë shumë më pak se turistët.

Disa turistë rusë mund të vijnë përmes Stambollit dhe Beogradit, aeroportet e të cilave janë ende të hapur për fluturimet nga Rusia. Por sektori i turizmit në Malin e Zi tashmë ka kthyer vëmendjen nga turistët që mund të vijnë nga Perëndimi, Europa Qendrore, Izraeli dhe Arabia Saudite. Turizmi përbën rreth 20% të ekonomisë së vendit.

Banka botërore uli pritshmëritë për rritjen ekonomike të Malit të Zi në 3.6% nga një nivel prej 5.9% i parashikuar më parë.

Por pritshmëritë janë ulur pwr tw gjitha vendet e Ballkanit Perëndimor në 3.1 %, nga 4.1% që parashikohej në janar. Ekonomia e gjashtë vendeve u rrit me 7.4% në 2021 pas një kontraktimi prej 3.2% në vitin 2020.

Në vitin para pandemisë Kroacia numëronte një total prej 154 mijë turistësh rusë dhe 139 mijë ukrainas. Në vitin 2021 ishin rreth 145 mijë turistë nga secili vend, sipas të dhënave zyrtare

Në janar dhe në shkurt të këtij viti 12 mijë rusë vizituan Kroacinë por gjatë muajit mars, prill dhe gjysmën e parë të majit vetëm 4500 rusë hynë në vend.

Në Shqipëri ku sektori i turizmit është në ankth për t’u rimëkëmbur nga pasojat e pandemisë, shpresat ishin të mëdha se viti 2022 do të ishte shumë i suksesshëm. Por lufta në Ukrainë ka zbehur optimizmin. Sektori i hotelerisë në Durrës konfirmoi se rezervimet nga Ukraina dhe Rusia janë anuluar. Por gjithsesi priten turistë nga vendet skandinave si dhe nga Polonia e Gjermania.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.