Maqedonia e Veriut kërkon 20 mijë punëtorë – Sektori i hotelerisë vuan mungesën e personelit
Sektori i hotelerisë në Maqedoninë e Veriut po përballet me mungesën e personelit, duke saktësuar se janë 20 mijë vendet e punës që kanë mbetur bosh. Ndërkohë nga Turqia kanë ardhur 5 mijë punëtorë pikërisht për sektorin e turizmit
Maqedonia e Veriut ka mbetur pa punëtorë në industrinë e hotelerisë. Të specializuarit në këtë sektor po largohen në mënyrë masive për të punuar jashtë vendit dhe nëse kjo gjendje nuk ndryshon, atëherë për një vit, gjysma e restoranteve dhe hoteleve do të detyrohen të mbyllin aktivitetin sipas paralajmërimeve të Odës së turizmit dhe hotelerisë.
Për të kompensuar mungesën e personelit, hotelierët kanë gjetur gjithsej pesë mijë kamerierë, pjatalarës, recepsionistë dhe shërbyese dhomash nga Turqia që kanë ardhur për të punuar në Maqedoninë e Veriut. Por ata kërkojnë të trajtohen dhe të paguhen njësoj si vendasit.
Kryetari i Odës së Turizmit dhe Hotelerisë u shpreh se 50 deri në 60% e subjekteve në këtë sektor do të mbyllen. Ai shtoi se mungojnë kuzhinierë, ndihmëskuzhinierë, pjatalarës, recepsionistë dhe shërbyes. Ai tha se Maqedoni e veriut nuk është tërheqëse për punonjësit e turizmit nga Serbia dhe Shqipëria, sepse ata punojnë kryesisht në bregdetin e Adriatikut ose në Greqi.
Këtë vit shumica e punëtorëve nga Maqedonia janë larguar për punë sezonale në Kroaci, ku për shkak të mungesës së stafit, paga ka arritur deri në 2000 euro.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.