Markat e hoteleve botërorë do sjellin turistë në Shqipëri – Eksperti Ozuni: Vendi nuk është gati për të ofruar një turizëm elitar

Zgjerimi i markave të hoteleve më të njohura ndërkombëtare po e kategorizon Shqipërinë si një pikë referimi për turistët e huaj. Në një intervistë për Tv Scan, eksperti i turizmit Ferjolt Ozuni thekson se klientët besnik të këtyre hoteleve të sapo inaguruar e kthejnë Shqipërinë në një atraksion turistik për t’u vizituar.

Ferjolt Ozuni Ekspert Turizmi: “Automatikisht që kemi disa emra që njihen pra brande hotelesh por jo vetëm, të cilët janë me famë ndërkombëtare automatikisht rritet dhe besueshmëria në pozicionin gjeografik ku këto brande janë të vendosura. Në rastin konkret ne kemi në momentin në fjalë kemi 5-6 brande në të gjithë Shqipërinë të cilët kanë krijuar një imazh të tyrin ndërkombëtar dhe këtë imazh po mundohen që ta ri-investojnë dhe në Shqipëri. Automatikisht klientët e këtyre besnik në momentin që shohin që ky brand ka ardhur dhe në Shqipëri bëhet Shqipëria atraksion në mënyrë automatike. Dhe kjo sjell një rritje të besueshmërisë por edhe një rritje të nivelit të klientelës se flasim për brande të cilët kanë një standard të lartë.”

Por sipas ekspertit Ozuni shihet me skepticisëm fakti që këto resorte ndërkombëtare janë shumë pak për ta konsideruar Shqipërinë një vend për të qenë atraksion për turistët e nivelit elitar. Sipas tij Shqipëria nuk është gati për të ofruar turizëm elitar.

“Ne nuk mund ta ofrojmë shërbimet e nevojshme për të qenë vend me turizëm elitar por as nuk mund të pretendojmë as në të ardhmen për të qenë turizëm elitar. Sepse që të jesh turizëm elitar nuk mund të bësh dhe turizëm masiv, dhe ne sot në Shqipëri po tentojmë dhe po bëjmë turizëm masiv. Pra po shohim më shumë nga të ardhurat e menjëhershme dhe kemi klientelën më të lehtë të aksesueshme. Pra është më kollaj të marrësh nëj klientelë që ka si target të shpenzojë max 100euro dita, sesa të kesh një klientelë që ka një buxhet shumë më të madh. Sepse të kapësh klientelën e turizmit elitar, do të thotë që të gjitha shërbimet, jo vetëm hoteli por të gjitha shërbimet të ofrojnë shërbime të kategorisë apo të nivelit të lartë, shërbime elitare. Ne këtu na mungon transporti elitar, sepse mjetet e transportit t udhëtarëve janë të viteve 2013-2014. Ne nuk kemi shërbime mbështetëse, të dedikuara për familje apo grupe të cilat kërkojnë cilësi. Por është më mirë që nuk ofrojmë një turizëm elitar sepse do të krijohej imazhi i një vendi të shtrenjtë gjë që ne nuk e kemi. Dhe është gjynah të krijojmë një imazh fals si një vend i shtrenjtë kur ne kemi çmimet më të lira në rajon.”

Pavarësisht se ky vit është pozitiv sa i përket aspektit të turizmit, por nga ana tjetër Shqipëria ende po has vështirësi në ofrimin e një shërbimi të kualifikuar e për të përballuar turistët.

 Diamila Leka/ SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.