Masa për të mbrojtur bizneset dhe qytetarët – Vendet e BE-së kanë ndarë 236 miliardë euro vitin e kaluar për të kompensuar krizën energjetike

Qeveritë e 25 vendeve të Bashkimit Evropian (BE) kanë ndarë një total prej rreth 236 miliardë euro që nga shtatori i kaluar për masat për të mbrojtur bizneset dhe qytetarët kundër rritjes së çmimeve të energjisë.

Politikat variojnë nga lehtësimet e taksave deri te ndihma financiare për familjet, sipas institutit të Bruegel me qendër në Bruksel.

Një nga masat që shumica e vendeve të BE-së të vëzhguara kanë zgjedhur është të ulin taksat e energjisë, duke përfshirë një pauzë në tarifimin e taksës së energjisë elektrike të gjelbër, siç është rasti në Austri. Gjithashtu, shumica e shteteve anëtare të BE-së kanë futur pagesa direkte (transferta) për familjet në nevojë.

Llojet e tjera të përgjigjeve të regjistruara nga Bruegel përfshijnë tavanet për çmimet me pakicë dhe me shumicë të energjisë elektrike dhe gazit, taksat e fitimit të papritur dhe mbështetjen për bizneset. Në Greqi, për shembull, qeveria po subvencionon faturat e energjisë elektrike dhe gazit natyror për familjet dhe bizneset e vogla.

Pjesa më e madhe e shumës totale të alokuar, ose mbi 180 miliardë euro, është regjistruar në katër vende, Gjermani (60.2 miliardë euro), Itali (49.5 miliardë euro), Francë (44.7 miliardë euro) dhe Spanjë (27.3 miliardë euro).

Bruegel vuri në dukje se të gjitha masat janë “diskutuar, propozuar ose miratuar” që nga shtatori 2021, kur kriza energjetike tashmë po shpalosej. Shifrat mbulojnë vetëm politikat kombëtare, ndërsa masat në nivelet nën-kombëtare dhe mbikombëtare, megjithëse jo më pak të rëndësishme, janë të përjashtuara nga objekti, tha instituti.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.