Mashtrim ndaj shtetit për 34 miliardë euro – Kontratat, korrupsioni dhe shpërblimet e “fryra” në Itali gjatë 5 viteve të fundit  

Mashtrimi ndaj shtetit me fonde publike në Itali nga viti 2017 deri në 2021 llogaritet në rreth 34 miliardë euro, mesatarisht 7 miliardë në vit. Rreferuar hetimeve të Guardia di Finanza për këtë periudhë, rrjedhja e parave publike kalon përmes ryshfeteve, kompanive fiktive, kontratave të manipuluara, shpenzimeve të fryra të sigurimeve shoqërore dhe shëndetësore, si dhe një rrjeti zyrtarësh publikë të korruptuar. Ana tjetër e medaljes janë rezultatet zyrtare, ku drejtësia ka arritur të sekuestrojë dhe rikuperojë vetëm një pjesë të vogël të parave të konstatuara, pak më shumë se 2 miliardë euro.

Dosjet e Guardia di Finanza zbulojnë se sa krimi prek xhepat e italianëve dhe sa persona janë të përfshirë. Sistemet e paligjshme në dëm të shpenzimeve publike dhe rrjedhimisht të qytetarëve, në këto pesë vite kanë çuar në denoncimin e 114.381 subjekteve.

Kontratat fiktive, ryshfetet dhe përgjegjësia administrative tatimore mbeten pikat më të nxehta, ku gjatë periudhës 2017-2021 thithën pothuajse shumën totale të evazionit të konstatuar. Më pas vijnë mashtrimet mbi fondet e ndërtimit, stimujt e biznesit, duke përfshirë grantet dhe kreditë e garantuara nga shteti të disbursuara gjatë periudhës së pandemisë, si dhe sektorët e bujqësisë dhe peshkimit.

Sipas hetimeve nga Guardia di Finanza, ryshfetet dhe kontratat fiktive kapin një vlerë totale prej 12.1 miliardë euro dhe në pesë vitet e fundit janë denoncuar 18.952 persona për këto vepra.

Ndërkohë, analizat e Njësisë së Informacionit Financiar (UIF) të Bankitalia, organit kundër pastrimit të parave, konfirmojnë gjithashtu një tendencë në rritje të fenomenit. 128 raporte për transaksione të dyshimta të autoriteteve vendore ju referuan drejtësisë në vitin 2021.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.