Mashtrime me shpenzimet publike në Britani – Buxheti ka humbur të paktën 21 miliardë paund në dy vitet e fundit
Qeveria e Britanisë ka humbur dhjetëra miliarda paund nga mashtrimet në vitet e fundit, me shumicën e organeve publike të paaftë për të kuptuar shkallën e problemit, deklaroi mbikqyrësi i pavarur i shpenzimeve publike. Zyra Kombëtare e Auditimit tha se llogaritë e qeverisë treguan për mashtrim me një vlerë totale prej 21 miliardë paund në vitet financiare 2020/21 dhe 2021/22, nga 5.5 miliardë paund në dy vitet e mëparshëm. Prej tyre, 7.3 miliardë paund lidheshin me skemat e përkohshme të COVID-19, shumica e të cilave përfshinin kredi për bizneset.
Kosto e mashtrimit mund të jetë shumë më e lartë, theksoi mbikqyrësi, duke treguar shifrat e mashtrimit në mes 33.2 miliardë dhe 58.8 miliardë paund vetëm për vitin 2020/21, përjashtuar shpenzimet e lidhura me pandeminë.
Sipas Zyrës Kombëtare të Auditimit, shumica e departamenteve qeveritare kishin pak aftësi për të luftuar mashtrimin, apo edhe për të kuptuar se sa i madh ishte rreziku.
“Përveç humbjes së parave të taksapaguesve, kjo krijon rrezikun që njerëzit ta perceptojnë mashtrimin dhe korrupsionin në të gjithë qeverinë si normale dhe të toleruar. Nëse nuk trajtohet, kjo mund të ndikojë në besimin e publikut në integritetin e shërbimeve publike”, theksojnë ekspertët
Pozicioni i Britanisë në Indeksin e Perceptimit të Korrupsionit të Transparency International ra ndjeshëm vitin e kaluar, që i atribuhet uljes së standardeve në qeveri dhe kontrolleve mbi përdorimin e parave të taksapaguesve.
Ministri i Financave, Jeremy Hunt, deklaroi së fundmi se, lufta kundër mashtrimit me taksat dhe përfitimeve shtetërore ishin prioritete për qeverinë.
Dorina Kurtaj/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.