Materialet e ndërtimit janë rritur me 33% – Kushtuan mesatarisht 47 euro/ton më shumë duke shtrenjtuar çmimin e banesave

Tregu i pasurive të paluajtshme ka qenë një ndër sektorët që ka pësuar ndryshim të fortë çmimesh si pasojë e konfliktit Rusi-Ukrainë. Përgjatë këtyre muajve, ekspertët e tregut immobiliar vlerësojnë se rritja e çmimeve për banesat është regjistruar deri nivelin mesatar 22 për qind krahasuar me vitin e kaluar, por pavarësisht këtij trendi, sërish kërkesa për blerje nuk ka rënë.

Në këtë përqindje merren në konsideratë disa faktorë, si qyteti në të cilin ndërtohet, zona, cilësia, infrastruktura, etj. Si një ndër shkaqet kryesore të kostos më të lartë të blerjes së një banese, ekspertët rendisin materialet e ndërtimit, të cilët sipas tyre, kanë kushtuar më shtrenjtë.

Por çfarë tregojnë shifrat në import? SCAN TV ka siguruar të dhënat zyrtare të Drejtorisë së Përgjithshshme të Doganave për importin e materialeve të ndërtimit gjatë periudhës së krizës. Referuar të dhënave, rezulton se për periudhën Janar-Gusht 2022 janë importuar 689.7 mijë ton materiale me një rënie prej -18 për qind krahasuar 8 mujorin e një vitit më parë. Por, pavarësisht se volume i importeve të mallrave që përdoren në ndërtim ka pësuar rënie, vlera  e paguar rezulton me rritje e cila fiksohet në 9.35 për qind.

Përgjatë periudhës së krizës kompanitë kanë paguar 15.2 miliard lekë materiale ndërtimi apo 130 milionë euro, nga  13.9 miliardë lekë apo 119 milionë euro që rezultuan në të njëjtën periudhë të një viti më parë për një volum më të lartë.  E thënë ndryshe, përgjatë këtij viti, mesatarisht një ton materialesh ndërtimi, ka kushtuar 47 euro apo 33 për qind më shumë se një vit më prarë.

Ukraina është edhe një ndër eksportuesit kryesorë të materialeve të ndërtimit kryesisht hekur gjë që ka afektuar tregun, por edhe ridimensionimi i tregjeve në tërësi ka sjellë këto pasoja, pasi vendi ynë importon produkte të ndryshme që përdroren në këtë sektor, si inerte, hidrosanitare, pllaka, etj.

Elisabeta Dosku / SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.