“Matja vjetore për energjinë e vetëprodhuar” – Pr.ligji nxirret për konsultim, “rrëzohet” kërkesa e biznesit për rritje të kapacitetit të lejuar    

Matja e prodhimit të energjisë për nevoja autokonsumatore do të jetë vjetore, dhe jo mujore sikurse deri më tani”. Pas shumë kohësh premtimesh, Ministria e Infrastrtukutrës dhe Energjisë ka nxjerrë për konsultim publik ligjin “Për nxitjen e përdorimit të energjisë nga burimet e rinovueshme”, ku parashikon ndryshimet në skemën e matjes, që deri më tani sipas ekspertëve ka qenë një pengesë serioze për instalimin e paneleve fotovoltaike.  Ligji i nxjerrë për konsultim është një dokument tërësisht i ri, që shfuqizon ligjin e mëparshëm të miratuar në vitin 2017.

Mbetet e paqartë se përse është propozuar një draft i tillë, por ajo që vlen të theksohet është se hyrja në fuqi e netimin vjetor për energjinë e prodhuar na dielli për qëllime autokonsumatore do të kërkojë sërish kohë. Kjo pasi, ligji do të rrijë në konsultim public deri në datën 14 tetor 2022, ndërsa më pas duhet të ndjekë procedurat e miratimit në parlament, që duke marrë në konsdieratë faktin se nuk bëhet fjalë për ndryshimin e vetëm dissa neneve, do të kërkojë kohë për t’u miratuar.

Ndërkojë që, edhe pas kalimit në seancë plenare, dokumenti i miratuar do të hyjë në fuqi 15 ditë pas botimit në Fletoren Zyrtare. Ndërkaq, pas hyrjes në fuqi do të duhet që Këshilli i Ministrave të miratojë një vendim ku të përcaktojë të drejtat dhe përgjegjësitë e vetë-konsumatorëve të rinovueshëm. Ndër të tjera, vendimi do të përmbajë skemën e kompensimit bazuar në metodologjinë e Faturimit neto; Procedura e aplikimit për vetë-konsumatorët e rinovueshëm, duke përfshirë afatet përkatëse, etj.

Ndërkaq, teksa kërkesa e bizneseve dhe grupeve të interesit për matjen vjetore të prodhimit të energjisë, duket se ka gjetur mbëhstetjen e qeverisë, rritja e kapacitetit të lejuar që mund të instalohet nuk është pranuar. Edhe sipas projektligjit të ri, vetë-konsumatorët e rinovueshëm do të kenë një kapacitet maksimal prej 500 Kwp.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.