Matja vjetore për vetëprodhuesit e energjisë – Panelet diellore/2 muaj pas miratimit të ligjit, skema e shumëkërkuar s’mund të aplikohet

Matja vjetore për vetëprodhuesit e energjisë elektrike nuk mund të aplikohet ende, pavarësisht se ndryshimet ligjore kanë 2 muaj që janë miratuar nga parlamenti. Kjo për shkak se vendimi i qeverisë, që do të përcaktojë procedurar konkrete, që do të ndiqen në këtë drejtim nuk është miratuar.

Ndërkohë që, aplikimi i skemës së re është i shumëpritur, kryesisht nga bizneset të cilët kërkojnë të vetëprodhojnë energjinë për të ulur kostot. Vendimi i qeverisë do të duhet të përcaktojë të drejtat dhe përgjegjësitë e vetëkonsumatorëve të rinovueshëm dhe ndër të tjera, ai do të përmbajë skemën e kompensimit bazuar në metodologjinë e faturimit neto; procedurën e aplikimit për vetëkonsumatorët e rinovueshëm, duke përfshirë afatet përkatëse, etj.

Aplikimi i skemës për matjen vjetore dhe jo mujore të energjisë të prodhuar nga panelet diellore të instaluara për qëllime autokonsumatore ka kohë që kërkohet nga bizneset dhe grupet e interesit, teksa viti që lamë pas shënoi një kërkesë në rritje për instalimin e këtyre impianteve, si pasojë e çmimeve tejet të larta e të papërballueshme të energjisë elektrike.

Sipas të dhënave të fundit të disponueshme, numri i konsumatorëve që mbajnë statusin e vetëprodhuesit të energjisë elektrike arriti në 1025 në fund të vitit 2022, ndërkohë që kapaciteti total i instaluar nga kjo kategori shkoi në 102 618 kWp.

Ola Mitre/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.