Mbarojnë “ditët e bukura” të lekut – Monedha e përbashkët europiane fiton terren brenda dy javësh nga nënçmimi rekord
Pas një renie rekord në fitët e fundit të dhjetorit nën kuotën mesatare 113 lekëve, euro po shënon rritje të fortë në janar. Këtë të hënë, kursi mesatar i këmbimit të monedhës së përbashkët europiane ishte 117.32 lekë, me një rënie të lehtë krahasuar me datën 6, por gjithësesi duke mbetur mbi kuotën e 117 lekëve. Çmimi në blerje, sipas Bankës së Shqipërisë ishte 116.8 lekë, ndërsa në shitje ishte 117.76. Kjo kuotë vjen vetëm pak ditë pasi monedha e përbashkët europiane shënoi edhe vlerën më të ulët mesatare prej 112.83 lekësh më datë 28 dhjetor të vitit që sapo lamë pas.
Për t’u parë mbetet nëse rritja e shënuar këto ditë e monedhës së përbashkët evropiane do të ndjekë trendin e tregjeve ndërkombëtare, ku euro është forcuar vazhdimisht pas ndërhyrjes së Bankës Qendrore Europiane, e cila për shumë aktorë ishte e vonuar.
Dhe duket se ditët e para të këtij viti, euro po reagon si në tregjet evropiane, prej javësh po rritet me ritme të qëndrueshme. Javët e fundit monedha e përbashkët ka shënuar rritje më raport me dollarin pas ndërhyrjes së Bankës Qendrore Europiane, e cila më në fund vendosi të ndërhyjë me rritjen e normës bazë të interesit si masë për ndalimin e inflacionit në Eurozonë. Dhe ishin pikërisht këto dy faktorë që shkaktuan dramën e monedhës së përbashkët europiane përgjatë vitit, inflacioni dhe veprimet e rezervës Federale amerikane. Sjellja e lekut në raport me euron duhet parë edhe me përfundimin e efektit sezonal, me flukset valutore në rritje për shkak të kthimit në shtëpi të emigrantëve.
Sipas agjentëve të këmbimit valutor në fund të vitit që sapo lamë pas për një seri faktorësh, në treg ka pasur sasi të konsiderueshme valutash, veçanërisht të monedhës së përbashkët europiane. Ndërkohë që ndikim të dorës së parë në mbiçmimin e lekut në fund të vitit që sapo lamë pas ka pasur situata e reshjeve. Për shkak të rritjes së prodhimit vendas, KESH nuk ka pasur nevojë të sigurojë sasi të konsiderueshme eurosh në tregun e brendshëm.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.