Mbi 5.500 shqiptarë ju shtuan skemave të pensioneve private – Në prag të ndryshimeve ligjore nga AMF, fondet e investuara u rritën me 10 milionë euro

Rreth 5.500 qytetarë u janë shtuar skemave të pensioneve private gjatë vitit 2022 duke e çuar në mbi 36.500 numrin total të personave që kanë zgjedhur të investojnë vullnetarisht për të siguruar të ardhura shtesë me mbërritjen e moshës së shkëputjes së marrëdhënieve të punës.

Të dhënat e sapopublikuara nga Autoriteti i Mbikqyrjes Financiare flasin për rritje të ndjeshme edhe të volumit të fondeve të investuara nga qytetarët në këto skema. Analiza e të dhënave për tregun e pensioneve private vullnetare më 31.12.2022 tregon një total asetesh neto prej 5,6 miliardë lekësh (49.89 milionë euro dhe me një rritje prej 1,114.84 milionë lekë (24.32%) krahasuar me 31.12.2021. Kjo rritje përthehet në rreth 10 milionë euro më shumë se një vit më parë në katër fondet e pensioneve vullnetare private që operojnë aktualisht në Shqipëri.

Ndërkaq, numri i anëtarëve në fondet e pensioneve, më 31.12.2022 rezultoi 36,518 duke shënuar një rritje prej 8.78% krahasuar me fundin e vitit 2021, kur ky numër ishte rreth 31 mijë.

Gjithësesi, sipas Autoritetit të Mbikqyrjes Financiare, numri i anëtarëve është ende i ulët, shkak për të cilin edhe po ndërmerr disa ndryshime ligjore që synojnë nxitjen e kësaj skeme duke ulur tarifat në rastet kur fondi tërhiqet me këste.

Ndryshimet parashikojnë mbrojte më efikase të interesave të anëtarëve të fondit të pensionit privat, nëpërmjet vendosjes së standarteve më të larta për mirëinformim dhe transparencë, nxitja e pjesëmarrjes në skemë nëpërmjet përfshirjes automatike, si dhe rishikimit të politikës tatimore me synim krijimin e lehtësirave fiskale.

Lorenc Rabeta/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.