“Më shumë mbështetje financiare për eficiencën e energjisë” – Skemat, studimi: Të ndërmerren politika nga institucionet qendore e vendore

Skemat e mbështetjes financiare për energjitë e rinovueshme dhe eficiencën e energjisë në vendin tonë janë në nivele shumë të ulta, krahasuar me programet mbështetese të vendeve të Bashkimit Europian apo dhe vendet e rajonit”. Kjo është një prej gjetjeve të studimit mbi këto skema, të realizuar nga organizata Milieukontakt, që thekson nevojën e mbështetjes financiare përmes politikave që mund të ndërmerren nga autoritetet qendore dhe ato lokale. Sipas raportit, kursimi energjetik përbën një nga kushtet themelore për zhvillimin ekonomik të një vendi dhe gjithashtu mbetet një prej politikave të detyrueshme për vendet që aspirojnë të jenë pjesë e Bashkimit Europian.

“Prandaj është shumë e rendësishme që të gjithë aktorët e shoqërisë të ndërmarrin iniciativa konkrete për të informuar dhe mbështetur me skema të ndryshme financimi grupet më të prekura për të përballuar pasojat socio-ekonomike të krizës energjitike që ka prekur te gjithë botën”, – thuhet ndër të tjera në studim.

Ndërkaq, nisur nga skemat e pakta që janë aplikuar deri më tani, në studim jepen një sërë rekomandimesh për orientimin e politikave në Shqipëri dhe mbështetjen e familjeve që janë në kushtet e varfërisë energjetike. Më konkretisht, kërkohet që Agjencia e Eficiencës së Energjisë të hartojë dhe zbatojë një plan veprimi për rinovimin e stokut të ndërtesave nën parimin e rritjes së performancës së tyre energjitike.

Po ashtu, nevojitet lehtësim i kuadrit ligjor dhe procedurave administrative përsa i përket familjeve të cilat duan të investojnë në energji të rinovueshme për vetëkonsum, ndërsa sektori bankar duhet të lehtësojë procedurat e marrjes së një kredie për termoizolim dhe hidroizolimin e shtëpive, mundësisht me norma interesi ‘0’ ose sa më të ulta.

Gjithashtu, bashkitë duhet të hartojnë plane lokale të veprimit për reduktimin e riskut nga ndryshimet klimatike dhe të planifikojnë programe financimi dhe rinovimi për banesat e vjetra të cilat nuk plotësojnë kushtet.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.