“Mëngjesi britanik”, gjithnjë e më i shtrenjtë – Kostoja mesatare e përbërësve të zakonshëm u rrit me 22%

Çmimi i një vakti mëngjesi në Angli është tashmë në nivele rekord duke dalë “jashtë kontrollit” pavarësisht ngadalësimit të lehtë të inflacionit. Kostoja mesatare e përbërësve të nevojshëm për të përgatitur një mëngjes u rrit më shumë se 22% krahasuar me një vit më parë.

Indeksi i vaktit të mëngjesit përmbledh të dhëna nga Zyra e Statistikave të Britanisë, duke analizuar çmimet e sallamit, proshutës, vezëve, bukës, gjalpit, domateve, kërpudhave, qumështit, çajit dhe kafesë. Siç u theksua, nuk ekziston mundësia e “qetësisë” për familjet që kanë probleme me çmimet e larta të ushqimeve.

Ekonomistët në vend shprehen se kriza e kostos së jetesës ekziston, me konsumatorët që shpenzojnë më shumë për gjërat thelbësore. Ky sipas tyre është një lajm i keq për industritë më të gjera të shitjes me pakicë dhe ato argëtuese.

Qumështi regjistroi rritjen më të madhe të çmimit, duke u rritur me 50% nga një vit më parë. Pasuan vezët dhe gjalpi, ndërsa kafeja dhe çaji patën gjithashtu rritje të mëdha. Supermarketet janë nën presion pasi balancojnë kostot më të larta me nevojën për të tërhequr klientët.

Tensionet midis shitësve me pakicë dhe furnitorëve janë gjithashtu të larta në Mbretërinë e Bashkuar dhe blerësit po zgjedhin më shumë produktet të markave jo shumë të njohura për të kursyer para.

Edhe supermarketet franceze janë nën presionin e inflacionit. Ministri i Financave Bruno Le Maire do të takohet me tregtarët e vendit për të diskutuar mënyrat për të ulur çmimet e mallrave bazë në dyqanet e tyre.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.