Miliarda dollarë nga nxjerrja e naftës dhe e gazit – Fitimet rekord rikthejnë rezervat e energjisë tek lëndët djegëse

Lufta në Ukrainë, sanksionet perëndimore ndaj Rusisë dhe pasojat e saj, si dhe kriza e rëndë energjetike, që preku kryesisht Europën dhe në radhë të dytë Shtetet e Bashkuara të Amerikës, ndryshuan në mënyrë drastike të dhënat për gjigantët energjetikë të kontinentit të vjetër, që po ndjekin rrugën ndotëse të energjisë amerikane.

Me fitimet rekord të vendosura për vitin 2022, kompanitë europiane tani po i kthehen sërish naftës dhe gazit, pavarësisht se si do të ndikohen angazhimet e tyre për të reduktuar emetimet e dioksidit të karbonit. Kjo është një qasje tashmë e njohur për gjigantët amerikanë Exxon Mobil dhe Chevron, e ardhmja e të cilëve ka mbetur gjithmonë e lidhur me naftën.

Shell, BP dhe TotalEnergies kanë shpenzuar vitet e fundit duke u përpjekur të bindin investitorët për përfitimet e investimeve me emetim zero dhe energji të rinovueshme. Por në vitin 2022 ata ndryshuan kurs për shkak të dhjetëra miliarda dollarëve që fituan nga shpimet për naftë dhe gaz, si dhe obligacionet e tyre amerikane, sipas një raporti nga finance.yahoo.com. Ky ndryshim u nxit nga pushtimi rus i Ukrainës, i cili e ktheu fokusin e qeverive përsëri te siguria energjetike dhe krijoi një boshllëk të madh në furnizimet me naftë dhe gaz të Europës – një boshllëk që kompanitë e sipërpërmendura mundën ta mbushnin.

Shell ka thënë se do të ndalojë rritjen e shpenzimeve për njësinë e saj të burimeve të rinovueshme, ndërkohë që do të zgjerojë prodhimin e gazit natyror. BP ka ngadalësuar shkurtimet e planifikuara të prodhimit të karburanteve fosile dhe ka rishikuar objektivin e saj për reduktimin e emetimeve të gazeve serë. TotalEnergies po hap terminale të reja importi të gazit natyror të lëngshëm në Europë për të vazhduar një biznes që u zgjerua me 15% në 2022.

Vetëm Chevron u zotua muajin e kaluar të jepte 75 miliardë dollarë për aksionerët përmes kthimit të aksioneve, duke i zvogëluar programet e ngjashme në kompanitë europiane. Nuk është vetëm nafta ku europianët kanë filluar të ndjekin drejtime të njëjta si SHBA. Por dhe për sa i përket energjisë me emetime më të ulëta, të tilla si biokarburantet dhe karikimi i automjeteve elektrike.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.