Minierat, detyrim për rehabilitimin mjedisor – Ndryshon vlerësimi i garancive financiare, rriten pagesat për lejet e shfrytëzimit

Ola Mitre / SCAN

 

Ministria e Infrastrukturës dhe Energjisë ka miratuar mënyrën e re të vlerësimit të garancive financiare, që duhet të paguajnë mbajtësit e lejeve minerare për rehabilitimin e mjedisit.

Ndryshimi i parë lidhet me pagesën e garancisë financiare për realizimin e Programit Minimal të Punës, ku sipas udhëzimit të ri Shërbimi Gjeologjik Shqiptar dhe Agjencia Kombëtare e Burimeve Natyrore duhet të përgatisin projekt preventivat tip për mënyrën e llogaritjes së tyre.

Këto formularë duhet të mbajnë në konsideratë kostot për realizimin e veprimtarive të mbylljes së punimeve gjeologjike të kërkim-zbulimit, të rehabilitimit progresiv e të rehabilitimit përfundimtar të mjedisit, të zonës së lejuar minerare dhe të asaj të përdorur nga subjekti për zhvillimin e veprimtarisë minerare. Deri më tani, garancia financiare për lejet e kërkim – zbulimit dhe shfrytëzimit vlerësohej nga AKBN dhe ishte sa 10% e vlerës monetare të investimit vjetor të parashikuar.

Paralelisht, udhëzimi i ri përfshin preventivët e rinj tip për përcaktimin e vlerave që duhet të paguajnë kompanitë minerare për rehabilitimin përfundimtar dhe progresiv të mjedisit, si për lejet e kërkim-zbulimit dhe ato të shfrytëzimit.

Sipas preventivëve të rinj, plani i mbylljes së minierës shkon në 1,135,307 lekë, nga 206,504 lekë që ishte aktualisht, rehabilitimi i 1 ha karrierë për grupin e mineraleve metalore, jometalore, qymyret e bitumiet parashikohet shkon në 884,758 lekë, nga 584,432 lekë që ishte aktualisht, ndërsa rehabilitimi i 1 ha karrierë për grupin e mineraleve ndërtimore shkon në 946,846, nga 563115 lekë që parashikohej aktualisht.

Ndërkaq, plani i rehabilitimit të 1 ha karrierë, argjile bëhet 773,004 lekë, nga 392 490 lekë që ishte deri më tani. Gjithsesi, këto vlera janë shembuj dhe do të ndryshojnë në varësi të karakteristikave të madhësisë së minierës dhe volumit përkatës të punës. Preventivët tip që ishin në fuqi deri më tani ishin miratuar në vitin 2011.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.