“Mungojnë” 12 milion lekë për transportin e mësuesve të Roskovecit – Sindikata: Prej 5 muajsh e paguajmë vetë. Do bojkotojmë mësimin nëse nuk na rimbursohen

Që prej shtatorit, dhjetëra mësues të zonës së Roskovecit nuk marrin lekët e transportit. Përfaqësues të sindikatës së mësuesve deklaruan sot se do të nisin grevën duke e përshkallëzuar deri në pezullim të plotë të mësimit nëse nuk marrin përgjigje për këtë problematikë. 12 milionë lekë të vjetra është shumë që ZVA Roskovec nuk i ka paguar për transportin e mësuesve duke përfshirë edhe pagesën e vështirësisë në punë.

“Ne kemi që në shtator që na mbahen lekët e rrugës. Unë jam pjesë e sindikatës dhe në përfaqësi të mësuesve, kemi kryer veprimet tona dhe do ta përshkallëzojmë situatën duke kaluar deri në grevë nëse lekët e rrugës tonë do të mbahen. Është një procedurë e jashtëligjshme. Në shtator deri në dhjetor i bjer deri në 12 milionë lekë të vjetra që mbahen për të gjithë mësuesit e zonës. Ne kemi çuar këtë letër me një peticion prej 34 firmash të mësuesve. Kemi çuar në organet kompetente në ZBA-në e Roskovecit, kemi çuar letër dhe në kryeministri,” u shpreh Desdemona Karafili, nënkryetare e Sindikatës së Mësuesve, Roskovec.

Festim Muka, kryetar i Sindikatës së Mësuesve Roskovec tregon dhe sa mësues janë të prekur nga kjo situatë.

“Kemi një problem në ZVA Roskovec nga 230 mësues 174 vin nga fieri të cilët 5 muaj kanë që u është hequr transproti por dhe ëvshtirësia. Unë si drtejtues I sindikatës kam dërguar kërkesë te zva roskovec dhe deri në rkyeministri. Nga kontaktet që kemi është e vetmja zva me kaq shumë muaj pa paguar”, u shpreh Festim Muka, kryetar i Sindikatës së Mësuesve Roskovec.

Scan Tv e ka raportuar edhe më parë këtë problematikë. Të interesuar pranë Ministrisë së Arsimit na u raportua që në 2022 transporti për mësuesit është realizuar plotësisht ndërkohë për 2023 është alokuar një fond prej 1 miliardë e 55 milionë lekë, 145 milionë lekë më pak se vitin e kaluar. Ndërkohë vet Drejtoria Rajonale e Arsimit Parauniversitar Fier ka hapur tenderin për 2023 për transportin e mësuesve për disa qytete por këtu nuk përfshihet Roskoveci.

Marinela Lina/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.