N26 do të nisë tregtimin e kriptove në Austri – Banka gjermane online njofton se do të lehtësojë tregtimin për rreth 200 kriptomonedha
Banka gjermane online N26 tha të enjten se do të fillojë të lejojë disa klientë në Austri të tregtojnë kriptovaluta. Sipas bankës, do të zgjerohet shërbimi për klientët në vende të tjera në muajt e ardhshëm dhe përfundimisht do të lehtësohet tregtimi për rreth 200 kriptomonedha.
Banka e Berlinit është bashkuar me Bitpanda të Austrisë për të tregtuar dhe ruajtur monedha, por Bitpanda nuk ka një licencë për Gjermaninë, gjë që është një pengesë për N26 për të ofruar shërbime në tregun e saj vendas.
Vlera e kriptomonedhave kryesore si Bitcoin dhe Ether ka rënë ndjeshëm këtë vit pasi tkurrja e konsiderueshme në tregjet globale ka shtyrë investitorët të largohen nga asetet e rrezikshme. Në shumicën e vendeve, sektori i kripto-aseteve është kryesisht i parregulluar dhe rregullatorët kanë paralajmëruar se investitorët përballen me një rrezik të lartë humbjeje. Parlamenti Europian pritet të votojë mbi rregullat e reja novatore për kripto-asetet në dhjetor ose në fillim të vitit 2023.
“Blerja e kripto-aseteve është me rrezik të lartë dhe mund të rezultojë në humbjen e parave të shpenzuara,” njoftoi banka N26. Megjithatë, bashkëdrejtuesi i N26, Valentin Stalf, tha se kriptovalutat janë një klasë aktivesh interesante që kërkohen nga investitorët.
Kriptomonedhat zakonisht tregtohen në shkëmbime jashtë industrisë tradicionale financiare, por vitet e fundit, bankat e mëdha kanë filluar gjithnjë e më shumë të ofrojnë shërbime të lidhura me kriptovalutat për klientët.
Kapitalizimi i tregut i të gjitha kriptomonedhave është rreth 960 miliardë dollarë, me më shumë se 2 trilionë dollarë të humbura që nga piku nëntorin e kaluar.
Javën e kaluar, banka online N26 raportoi humbje më të mëdha për vitin 2021 dhe një ngadalësim të shtimit të klientëve, duke mbyllur një vit nën parashikimet për një nga kompanitë më të vlerësuara të fintech në Europë. Në shtator të po atij viti, rregullatori financiar gjerman e gjobiti bankën për shkelje në kontrollin e pastrimit të parave. Më vonë u urdhërua të kufizonte klientët e rinj dhe mbylli operacionet e saj në SHBA. Por, sot N26 thotë se ka përmirësuar kontrollin.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.