Nafta bie me mbi 6% gjatë kësaj jave – Ndikohet nga rritja e infektimeve në Kinë dhe nga ngadalësimi i ekonomisë
Nafta po tregtohet e qëndrueshme në sesionin e sotëm, por pritet të publikojë humbje javore për shkak të dobësimit të kërkesës në Kinë dhe rritjes së interesave nga bankat qendrore. Nafta Brent e Londrës ka zbritur poshtë 90 dollarëve për fuçi dhe po tregtohet në nivelin më të ulët në 4 javët e fundit nafta Bruto amerikane po tregtohet në rreth 82 dollarë për fuçi, niveli më i ulët në 6 javët e fundit.
Ndërkohë, gjatë kësaj jave, nafta Brent ka rënë me rreth 6%, ndërsa nafta Bruto ka rënë me rreth 8%. Analistët shprehen të shqetësuar për ngadalësimin e kërkesës në Kinë, si pasojë e rritjes së infektimeve me Covid-19, që kanë prekur nivelin më të lartë që nga prilli i këtij viti. Edhe shqetësimet për ngadalësimin e ekonomisë globale, si pasojë e rritjes së interesave nga bankat qendrore po ushtron presion mbi çmimet.
Në takimin e dhjetorit, Rezerva Federale pritet të rrisë normën bazë të interesit edhe me 50 pikë bazë, pas 4 rritjesh me radhë me 75 pikë bazë. Kina, që është importuesja më e madhe e naftës në botë, raportoi edhe mbi 25 mijë raste të reja me Covid-19 të enjten, duke detyruar autoritetet të vendosin kufizime të ashpra.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.