Nafta Brent bie pranë 100 dollarë për fuçi – Në dy sesionet e fundit ka rënë me 13 dollarë, ndikon ngadalësimi i ekonomisë

Nafta po shfaqet e qëndrueshme pranë 100 dollarëve për fuçi në sesionin e sotëm, ndërsa në dy sesionet e kaluara ka humbur rreth 13 dollarë. Investitorët janë të shqetësuar se ngadalësimi i ekonomisë globale do të dëmtojë edhe kërkesën për naftë. Por, humbjet po kufizohen nga shqetësimet që kanë të bëjnë me furnizimin e tregut.

Nafta Brent e Londrës po tregtohet në rreth 100 dollarë për fuçi, ndërsa nafta Bruto amerikane po tregtohet në rreth 98 dollarë për fuçi. Investitorët janë të fokusuar edhe te bisedimet për programin bërthamor me Iranin dhe nëse do të ketë një marrëveshje tregut mund ti shtohen rreth 1 milionë fuçi naftë në ditë.

Uashingtoni shtoi sanksionet ndaj Iranit të mërkurën, për të shtuar presionin ndaj Teheranit zyrtar për të ringjallur marrëveshjen bërthamore të vitit 2015, e cila u shfuqizua nga ish-Presidenti amerikan, Donald Trump.

Gjatë javëve të fundit, çmimet e naftës së bashku me lëndët e tjera të para, si metalet apo edhe vaji kanë rënë ndjeshëm, për shkak se bankat qëndrore në të gjithë botën kanë rritur normat e interesit për të mbajtur nën kontroll inflacionin.

Ndërkohë, të dhënat e publikuara në SHBA treguan se rezervat e naftës u rritën me 2.8 milionë fuçi, gjatë javës së kaluar, ndërsa rezervat e benzinës ranë me 1.8 milionë fuçi.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.